सुर्खेत चैत्र २८ गते । नेपाल लकडाउन भएको बेला पनि स्वास्थ्य राज्यमन्त्री नवराज रावत गृहजिल्ला सुर्खेत पुगेका छन । कोरोनाले सिंगो संसार आक्रान्त भइरहेका बेला राज्यमन्त्री रावत काठमाडौँबाट सुर्खेतको चौकुने गाउँपालिकामा पुगेका हुन ।
कोरोनाका कारण नागरिक आत्तिएका बेला राजनीतिक दलका नेताहरुले वास्ता नगरेको गुनासो बढेपछि राज्यमन्त्री रावत एकाएक आफ्नो निर्वाचन क्षेत्रमा पुगेका हुन् ।
केही दिनअघि कांग्रेस नेता तथा पूर्वराज्यमन्त्री तप्तबहादुर बिष्टले गाउँ गाउँ पुगेर साबुन वितरण गरेको चर्चा चलेपछि पश्चिम सुर्खेतका नागरिकको राज्यमन्त्री रावतको आलोचना गरेका थिए । विश्वसँगै देशव्यापी संकटका बेला आफ्ना नागरिकसामु पुग्न नसकेको गुनासो बढेपछि मन्त्री रावत रातारात आफ्नो निर्वाचन क्षेत्र पुगेका हुन् ।
बिहीबार मात्रै राज्यमन्त्री राउतले चौकुने गाउँपालिकामा पुगेर कोरोनाको अवस्था, क्वारेन्टाइनको व्यवस्थापन र थप गर्नुपर्ने कामका विषयमा गाउँपालिकाका अध्यक्ष धीरबहादुर शाही, उपाध्यक्ष निर्मला रानागर लगायतसँग छलफल गरेका छन ।
प्रतिनिधिसभा चुनावमा कांग्रेस उम्मेद्वार तथा पुर्वमन्त्री हृदयराम थानीलाई हराएर विजयी भएका रावत प्रधानमन्त्री केपी शर्मा ओलीका विश्वासपात्र भएका कारण परिवर्तित मन्त्रीमण्डलमा स्वास्थ्य राज्यमन्त्री बन्न सफल भएका हुन ।
केहीदिनअघि सुर्खेत प्रदेश अस्पतालमै कोरोना परीक्षण गर्न चीनबाट ल्याइएको मेशिन हस्तान्तरण गर्न पनि राज्यमन्त्री रावत आफै सुर्खेत पुगेका थिए ।
Discussion about this post