खोजखबर संवाददाता
बाँके साउन २६ गते । सहरी विकास मन्त्री मो. इस्तियाक राईले १० हजार रुख रोप्ने घोषणा गरेअनुसार आइतबारदेखि नेपालगन्जमा बृक्षारोपण शुरु गरिएको छ ।
सहरी विकास मन्त्रालयको समन्वयमा सहरी विकास मन्त्री राईले स्थानिय जमुनाहा चोकबाट १० फुटको रुख रोपेर १० हजार रुख रोप्ने कार्यको उद्घाटन गर्नु भयो ।
सहरी विकास मन्त्री राई आफ्नो निवासस्थलबाट करिब १ किलोमिटरको दुरी पैदल यात्रा तय गर्दै जमुनाहा चोकको डिभाइडरमा रुख रोप्नु भएको हो ।
१० हजार रुख रोपेर नेपालगन्जको सौन्दर्यकरण हुने विश्वास व्यक्त गर्दै सहरी विकास मन्त्रीले हाम्रा सम्वाददातासँग कुरा गर्दै भन्नुभयो–‘७ ठुला सहरमा यस्तै रुख रोप्ने अभियान अन्तरगत नेपालगन्जमा रुख रोप्ने कार्यको शुरुवात भएको छ । यसले सहरको सौन्दर्यकरण हुनुको साथै अत्यधिक गर्मी हुने नेपालगन्जमा यस्ता रुखले छहारीको कार्य पनि गर्नेछ ।’
१० हजार रुख रोप्ने कार्य शुरुवातीसँगै नेपालगन्जको हाई वे, सरकारी गैरसरकारी संघसंस्था, स्कुल तथा अस्पतालमा यस्ता रुख रोपिने सहरी विकास मन्त्री राईले बताउनु भयो ।
सहरी विकास मन्त्री राईले नेपालगन्जमा १० हजार रुख रोप्ने घोषणासँगै वन मन्त्री शक्ति बस्नेतले पनि देशभरीमा करोड रुख रोप्ने घोषणा गर्नु भएको थियो ।
नेपालगन्जमा हरियाली हुनु पर्नेमा जोड दिँदै नेपालगन्ज उपमहानगरपालिका मेयर डा. धवल सम्सेर राणाले पनि आइतबार सहरी विकास मन्त्री राईसँगै रुख रोपेर नेपालगन्जमा हरियाली हुने कुरामा विश्वास व्यक्त गर्नु भयो ।
सहरी विकास मन्त्री राईको अगुवाईमा बृक्षारोपणको कार्यक्रममा जिल्ला प्रहरी कार्यालयका एसपी विर बहादुर वलीले बेल्चाको सहयोगमा माटो हाल्दै रुख रोपेर सहरलाई ग्रीन सिटी बन्नु राम्रो कार्यको शुरुवात भएको बताउनु भयो ।
यसैगरी सहरी विकास मन्त्री राईको अगुवाईमा बृक्षारोपणको कार्यक्रममा सशस्त्र प्रहरी ३० नं. गणका एसपी दिपक अधिकारीले पनि रुख रोपेर बक्षारोपण गर्नु भएको थियो ।
यसैगरी उक्त बृक्षारोपण कार्यक्रममा प्रदेश नं. ५ विधायक विजय बहादुर यादव, जिल्ला प्रशासन कार्यालयका सहायक प्रमुख जिल्ला अधिकारी कृष्ण, नेपालगन्ज भन्सार कार्यालयका प्रमुख शान्ति राम निरौला, समाजवादी पार्टी जिल्ला अध्यक्ष कमरुद्दिन राई लगायत सशस्त्र प्रहरी ४० नं. राजस्व गुल्मका डिएसपी नवराज बोहरा लगायत स्थानिय नेताहरुले बृक्षारोपण गरेका थिए ।
Discussion about this post