खोजखबर संवाददाता जावेद अन्ससारी
बाँके साउन ३० गते । नेपालगन्ज उपमहानगरपालिकाका मेयर डा. धवल सम्सेर राणाले बागेश्वरी मन्दिर परिसरमा कम्प्लेक्स निर्माणको लागि शिलान्यास गरेपछि आएको व्यापक विरोध र सहरी विकास मन्त्री मो. इस्तियाक राई तत्कालै एक्सनमा आएपछि अहिले जिल्लामा मेयर डा. राणाको व्यापक विरोध भइरहेको छ ।
मेयर डा. राणाले बागेश्वरी मन्दिर परिसरमा कम्प्लेक्स निर्माणको शिलान्यास गरेको भोलि पल्ट नै स्थानिय जिल्लाबासीको व्यापक विरोध आएपछि सहरी विकास मन्त्री राईको आदेशमा तत्कालै मन्त्रालयले गृह मन्त्रालयलाई पठाएको पत्रमा ‘प्राचिन स्मारक संरक्षण ऐन, २०१३, सम्पदा संरक्षण ऐन तथा नगर विकास समिति नेपालगन्जको कार्ययोजना विपरित कार्य तुरुन्त रोक्न नियमानुसारआवश्यक प्रक्रिया अगाडी बढाउने’ उल्लेख गर्दै निर्माण कार्य रोक्न भनेको छ ।
सहरी विकास मन्त्री राईले टेलिफोनमा कुरा गर्दै भन्नुभयो–‘प्राचिन सम्पदा छेक्ने गरी ५०० मिटर सम्म यस्ता कुनै पनि निर्माण गर्न पाइदैन । यदि यस्ता कम्प्लेक्सको लागि नेपालगन्ज उपमहानगरपालिकाले नक्सा बनायो भने त्यो अवैधानिक हुन्छ ।’
मेयर डा. राणाले कम्पलेक्स शिलान्यासको विषयमा विभिन्न मिडियामा सामाचार आएपछि मन्त्री राईले भनेअनुसार स्थानिय अभियन्ता विवेक श्रेष्ठको अगुवाईमा ५ जनाले हस्ताक्षरसहित त्यस्ता निर्माण कार्य रोक्न निवेदन दिएपछि अहिले जिल्लाभरका हिन्दु लगायतका अन्य धर्मका मान्छेहरुपनि त्यस्ता निर्माण रोक्न आवाज उठाइरहेका छन् ।
सहरी विकास मन्त्रालयका ईन्जिनियर सौगात थापाको हस्ताक्षर रहेको सो पत्रमा जिल्ला प्रशासन कार्यालय बाँँके, बागेश्वरी गुठी व्यवस्थापन समिति नेपालगन्ज, विवेक श्रेष्ठ समाजसेवी नेपालगन्ज, उदय श्रेष्ठ राष्ट्रिय खबरडट कम, संघिय आयोजना कार्यान्वयन ईकाई बाँके र पुरातत्व विभाग लगायतलाई बोद्यार्थ पठाईएको छ ।
Discussion about this post