पोखरा असार ११ गते ।
कोरोना भाइरसको संक्रमणबाट मृत्यु भएका व्यक्तिको शव व्यवस्थापनको विषयलाई लिएर पोखरामा झडप भएको छ । कोरोना संक्रमणबाट मृत्यु भएकाको शव व्यवस्थापनमा अवरोध गर्नेहरूलाई तर्साउन पोखरामा प्रहरीले हवाई फायर गरेको जिल्ला प्रहरी कार्यालय कास्कीका डीएसपी सूचना अधिकारी सुवास हमालले जानकारी दिए ।
संक्रमण भएर पोखराको पश्चिमाञ्चल क्षेत्रीय अस्पतालमा उपचार गराइरहेका स्याङ्जाको अर्जुनचौपारी गाउँपालिकाका ५५ वर्षीय पुरुषको बुधबार राति मृत्यु भएको थियो । ती व्यक्तिको शव व्यवस्थापनलाई लिएर सुरक्षाकर्मी र स्थानीयबासीबीच झडप भएको हो । पोखरा महानगरपालिका-३२ मा मजुवामा सेतीनदी किनारनजिकै खाली जमिनमा बिहीबार ती पुरुषको शव गाड्न लैजाँदा स्थानीयले अवरोध गरेका थिए ।
शव गाड्न डोजरले खाल्डो खन्न लाग्दा स्थानीयले अवरोध गरेपछि ८ राउन्ड हवाई फायर गर्नुपरेको डीएसपी हमालले बताए । स्थानीयले आफ्नो गाउँठाउँमा शव गाड्न नदिने भन्दै सशस्त्र प्रहरीको गाडी नै तोडफोड गरेका छन् । सशस्त्रको गाडीको सिसा फुटेको छ । उनका अनुसार विरोधमा उत्रिएका ८ जनालाई प्रहरीले नियन्त्रणमा लिएको छ ।
सुरक्षाकर्मीले ती व्यक्तिको शवलाई सोही ठाउँमा व्यवस्थापन गरेको उनले बताए ।
Discussion about this post