बाँके असार १२ गते ।
नेपालगञ्जमा नक्कली जग्गाको नक्कली कागजपत्र तयार एक ब्यवसायीले सरकारी बैंकबाट एक करोड २५ लाख रुपिया ऋण लिएको खुलेको छ ।
घटनामा ब्यवसायी सहित बैंकका शाखा प्रबन्धकलाई अनुसन्धानका लागि पक्राउ गरिएको छ । नेपालगञ्ज उप–महानगरपालिका १३ का सुनचाँदी व्यवसायी रिजवान अहमद जसगढले राष्ट्रिय वाणिज्य बैंक त्रिभुवनचोक शाखाबाट दुई करोड रुपिया ऋण स्वीकृत गराई एक करोड २५ लाख रुपिया पाईसकेको जिल्ला प्रहरी कार्यालय बाँकेले जनाएको छ ।
सो घटनामा बैङ्कका शाखा प्रबन्धक ललितबहादुर शाहीलाई अनुसन्धानका लागि शुक्रबार पक्राउ छ । बैंकबाट ऋण पाउनका लागि जसगढले नक्कली जग्गाको लालपुर्जा, तिरो तिरेको रसिद, नक्सापास समेत किर्ते गरेको पाइएको प्रहरीले जनाएको छ । नक्कली कागजात बनाउन नेपालगञ्ज उपमहानगरपालिकाको लेटरप्याड, हस्ताक्षर छाप र प्रमुखको हस्ताक्षर समेत किर्ते गरेको प्रहरी अनुसन्धानबाट खुलेको छ ।
बैंकमा ऋणका लागि चारवटा धितो पेश गरेकोमा दुईवटा नक्कली पाइएको छ । नेपालगञ्ज ११ भट्टीटोलका ४÷४ धुरका दुईवटा धितो नक्कली पाइएको हो । नेपालगञ्ज उपमहानगरपालिकाले नक्कली कागजात बनाएर ऋण लिएको जानकारी पाएपछि अनुसन्धान गर्न जिल्ला प्रहरीलाई अनुरोध गरेको जिल्ला प्रहरी कार्यालय बाँकेका प्रहरी नायब उपरीक्षक सुबास खड्काले जानकारी दिनुभयो ।
Discussion about this post