बाँके असार २७ गते ।
४५ करोड रकम हिनामिना गरेको आरोप लागेका सहकारी वित्तिय विकास संस्था लिमिटेड नेपालगन्जका सञ्चालक समितिका संस्थापक अध्यक्ष हरदेवबक्स चौधरीलाई बाँके प्रहरीले शनिवार पक्राउ गरेको छ । चौधरीलाई नेपालगन्जबाटै पक्राउ गरिएको बाँकेका एसपी ओम राणाले जानकारी दिनुभयो ।
चौधरी सहकारीको रकम हिनामिना प्रकरणपछि फरार थिए । रकम हिनामिना प्रकरणमा बैंकका सन्चालक र कर्मचारीसहित ४१ जना विरुद्ध जिल्ला अदालतमा अभियोग दर्ता भएको छ । तिमध्ये अधिकांश पक्राउ परिसकेका छन् । केही कारागार चलान भएका छन् भने केही धरौटीमा रिहा भएका छन् । सहकारीका प्रमुख प्रबन्धक गोपाल भण्डारी, सहायक प्रमुख प्रबन्धक गङ्गाधर सुवेदी, बैंङिक प्रबन्धक अरुणकुमार पाठक र उपसहायक बलराम यादवलाई भने पुर्पक्षका लागि कारागारमा चलान भइसकेका छन् ।
जिल्ला अदालत बाँकेमा सहकारीका सञ्चालक र कर्मचारी गरी ४१ जनाविरुद्ध सहकारी रकम हिनामिना, ठगी र संगठीत अपराधअन्तर्गत अभियोग पत्र दायर भएको थियो । सहकारीका ११ हजार ९०८ निक्षेपकर्ता र एक हजार ८६० शेयरधनीमध्ये एक हजार नौ निक्षेपकर्ता र शेयर धनीले जिल्ला प्रहरी कार्यालय बाँकेमा आफ्नो रकम फिर्ता गरी अभियुक्तमाथि कारबाहीको माग गर्दै जाहेरी दिएका थिए ।
Discussion about this post