बाँके साउन ६ गते ।
प्रथम जन निर्वाचित प्रधानमन्त्री तथा नेपाली कांग्रेसका संस्थापक नेता वीपी कोइरालाको ३८ औं स्मृति दिवस मंगलवार विभिन्न कार्यक्रमको आयोजना गरी मनाइएको छ ।
३८ औं वीपी स्मृति दिवसका अवसरमा नेपाली काँग्रेस बाँकेले नेपालगन्जको वीपीचोकमा रहेको शालिकमा माल्र्यापण गरेको छ । नेपाली काँग्रेस बाँकेको आयोजनामा भएको कार्यक्रममा पार्टीका जिल्लास्तरीय नेता तथा कार्यकर्ताहरुको सहभागीता रहेको थियो ।
माल्यार्पणपछि कार्यक्रमलाई सम्वोधन गर्दै पार्टी सभापति किरण कोइरालाले वीपीको सिद्धान्तलाई सबैले पालना गर्नुपर्नेमा जोड दिनुभयो । उहाँले वीपीपथमा हिड्न सबै कार्यकर्ताहरुलाई निर्देशन समेत दिनुभयो ।
सभापति कोइरालाले नेपाली राजनीतिका शिखर पुरुष विपी कोइरालाले देखाएको बाटोमा कांग्रेस हिंड्न सके उहाँप्रति सच्चा श्रद्धाञ्जली हुने बताउनुभयो । उहाँको आदर्श र मूल्यको राजनीति चीरकाल पर्यन्त स्मरणीय रहने सभापति कोइरालाले बताउनुभयो ।
अहिले बहुमतको सरकार हुँदा पनि जनताले अनुभूति गर्न नपाएको प्रसंग कोट्याउँदै सभापति कोइरालाले जताततै भ्रष्टाचार मौलाएको टिप्पणी गर्नुभयो ।कार्यक्रममा पार्टी उपसभापति सुनिल नरसिंह राणा, सचिव तप्त पौडेल लगायत नेता कार्यकर्ताको उपस्थिति थियो ।
साहित्यकारको रुपमा समेत परिचित कोइराला प्रजातान्त्रिक समाजवादका प्रवर्तक मानिनुहुन्छ । ३८ बर्ष अघि आजकै दिन साउन ६ गते वीपी कोइरालाको देहवासान भएको थियो ।
Discussion about this post