खोजखबर संवाददाता
बाँके भदौ १५ गते । सहरी विकास मन्त्री मोहम्मद ईश्तियाक राईले नेपालगञ्ज र बाँकेको विकासका लागि उपमहानगरपालिका तथा सहरी विकास मन्त्रालयविच निकै राम्रो समन्वय र सहकार्य भैरहेको बताएका छन् । उनले भने–नेपालगञ्जलाई देशकै नमुना सहर बनाउने अभियानमा नेपालगञ्जका मेयर र मेरो विचमा कुनै पनि विवाद छैन, हामीले मिलेर काम गरिरहेका छौं ।
समाजवादी पार्टी बाँकेले आइतवार यहाँ आयोजना गरेको पत्रकार सम्मेलनमा मन्त्री राईले सहरी विकास मन्त्रालय सम्हालेपछि हालसम्म जिल्ला र नगरका लागि गरिएका विकास निर्माण तथा आगामी बर्षका कार्ययोजनाहरु बारे विस्तृत रुपमा जानकारी गराए ।
उनले निर्वाचनमा गरेका प्रतिवद्धताहरु पुरा गर्न आफु तिव्र गतिमा लागेको जनाउँदै बाँके क्षेत्र नम्बर २ र नेपालगञ्जको विकासका लागि अर्बौका योजनाहरु संचालनमा रहेको बताए ।
करिब २ अर्बका योजनाहरु हाल संचालनमा रहेको जनाउँदै उनले आगामी बर्षका लागि करिब ३ अर्बका योजनाहरु स्विकृत भै टेण्डरको प्रक्रियामा पुगेको बताए ।
पछिल्लो समयमा विभिन्न सामाजिक संजालमा मेयर र मन्त्रीको विवाद रहेको भन्ने कुराहरु आईरहेकोमा वास्तविकता त्यस्तो नभएको प्रष्ट पार्दै उनले भने–स्थानीय प्रतिनिधि र संघिय प्रतिनिधीका अलग अलग काम छन् । अलग अलग हैसियत छ र दुबैको आ – आफ्नो अधिकार क्षेत्र छ । तसर्थ विवादको कुनै प्रश्न नै आउँदैन ।
तर, नेपालगञ्ज उपमहानगर सम्मिलित बाँके क्षेत्र नम्बर २ को प्रतिनिधिको हैसियत तथा सरकारको मन्त्रीको हैसियतले यहाँका जनताले ध्यानाकर्षण गराएका कुराहरुमा ध्यान जानु स्वभाविक भएको उनले बताए । बागेश्वरी मन्दिरको शपिंग कम्पलेक्स निर्माण र तीन दर्जन गाई मरेको कुरामा सयौं नागरिकले ध्यानाकर्षण गराएको र पत्र समेत लेखेकोले यस क्षेत्रको प्रतिनिधीको हैसियतले आफुले सम्बन्धित निकायमा कानुन बमोजिम गर्नु भनि आग्रह गरेको मन्त्री राईले सो अवसरमा बताए ।
उनले गाई संरक्षणका लागि आफुले जुनसुकै सहयोग गर्न तयार रहेको जनाउँदै सो विषयमा सर्वदलीय सहमति गरेर मात्र अगाडी बढ्नु पर्नेमा जोड दिए । सो अवसरमा समाजवादी पार्टी बाँकेका अध्यक्ष कमरुद्दीन राई, उपाध्यक्ष राजन राना मगर, नगर अध्यक्ष श्रवण यादव र मन्त्रीका स्वकिय सचिव शमशुल राई लगायतको उपस्थिति रहेको थियो ।
Discussion about this post