काठमाडौ असोज २६ गते ।
तत्कालिन नेकपा माओवादी केन्द्र र एमालेबीच पार्टी एकता घोषणा भएको साढे दुई वर्ष बितिसक्दा पनि अझै एकताका बाँकी काम टुंगिएको छैन। भदौ २६ गते बसेको स्थायी कमिटी निर्णयअनुसार असोज महिनाभित्र पार्टी एकताका बाँकी काम सकिनुपर्छ। असोज महिना सकिन अब ४ दिन मात्रै बाँकी छ।
तर पार्टीका दुई अध्यक्ष केपी शर्मा ओली र पुष्पकमल दाहाल ’प्रचण्ड’बीच नै सरकार र पार्टीलाई लिएर भइरहेको विवाद अझै जारी छ। यस्तो स्थितिमा दुई वर्षभन्दा बढी समयदेखि थाँती रहेको काम ४ दिनमा सक्न नेकपाले पापड बेल्नुपर्ने देखिन्छ। असोज ६ गते बसेको सचिवालय बैठकले अध्यक्षद्वय ओली, प्रचण्ड र महासचिव बिष्णु पौडेललाई पार्टी एकताका बाँकी काम सक्ने कार्ययोजना बनाउन १० दिनको समय दिएको थियो। तर, अहिलेसम्म अध्यक्षद्वय र महासचिवले पार्टी एकताको कार्ययोजना बनाउन समेत सकेका छैनन्।
प्रधानमन्त्री ओली र अध्यक्ष दाहालबीच पटक(पटक भेटवार्ता हुन गरेपनि पार्टी एकताको बाँकी काम सक्नेबारे निर्णायक कुरा खासै नभएको बुझिन्छ। पार्टी एकताका बाँकी काम स्थायी कमिटीको निर्णयअनुसार सक्नुपर्ने स्थायी कमिटी सदस्य लीलामणि पोखरेल बताउँछन्। ‘पार्टी एकता भएको यत्रो समय भइसक्यो, तर अहिलेसम्म एकताले पूर्णता पाएन,’ उनले भने, ‘स्थायी कमिटी बैठकको निर्णय अनुसार यही महिनाभित्र सो काम सक्नुपर्ने हो, अध्यक्षद्वय बसिराख्नुभएको छ, टुंगिएला भन्ने लाग्छ।’ अर्का स्थायी कमिटी सदस्य मणि थापा पनि एकताको काम सक्न धेरै समय नलाग्ने बताउँछन्।
‘पार्टी एकताको काम धेरै बाँकी छैन, पार्टीको निर्णयअनुसार कार्यान्वयन होला,’ उनले भने। स्थायी कमिटी सदस्य मातृका यादव पनि स्थायी कमिटीको निर्णयअनुसार पार्टी एकताको काम सक्नुपर्ने बताउँछन्। ‘पार्टी एकताको काम धेरै बाँकी छैन, अध्यक्षद्वय र महासचिवलाई सचिवालयले कार्ययोजना बनाउने जिम्मेवारी दिएको छ, उहाँहरुले निकास निकाल्नुहोला,’ उनले भने।
नेकपामा जनसंगठनहरू, पाँचवटा निकाय, ३२ विभागसहित एक नीति प्रतिष्ठान, प्रवास समन्वय र विशेष जिल्ला कमिटीले पूर्णता पाउन बाँकी छ। यद्यपी, प्रधानमन्त्री ओली र अध्यक्ष दाहाल पार्टी एकताको कामभन्दा पनि मन्त्रिपरिषद् पुनर्गठन, संवैधानिक नियुक्तिको भागबण्डामा अल्झिएका छन्।
Discussion about this post