बर्दिया भदौ ८ गते ।
जिल्ला ट्राफिक कार्यालय बर्दियाले आर्थिक वर्ष ०७७÷७८ मा अघिल्लो आर्थिक वर्षभन्दा झन्डै दोब्बरले राजश्व संकलन गरेको छ । आर्थिक वर्ष ०७६÷७७ मा ६५ लाख २ हजार राजश्व संकलन गरेको ट्राफिक प्रहरीले ०७७÷७८ मा भने १ करोड बढी राजश्व संकलन गरेको छ । कार्यालय प्रमुख गोपालबहादुर ज्ञवालीका अनुसार ०७७÷७८ मा १ करोड १५ लाख ८ हजार ५ सय रुपैयाँ राजश्व संकलन भएको हो ।
ट्राफिक नियम उल्लंघन गर्ने सवारी साधनलाई कारवाही गर्दा राजश्व संकलन बढेको उहाँको भनाइ छ । उहाँका अनुसार योअवधिमा १७ हजार ९ सय ३९ वटा सवारी साधन कारवाहीमा परेका छन् । जवकी अघिल्लो वर्षको ०७६÷७७ मा ११ हजार २ सय ३५ सवारी साधन कारवाहीमा परेका थिए । आर्थिक वर्ष ०७७÷७८ मा सबैभन्दा धेरै कार्तिक महिनामा १० लाख ८८ हजार ५ सय राजश्व उठेको छ भने सबैभन्दा कम जेठ महिनामा २ लाख ९७ हजार ५ सय रुपैयाँमात्रै राजश्व उठेको छ ।
कुन महिनामा कति राजश्व ?
जिल्ला ट्राफिक कार्यालयका अनुसार साउन महिनामा १ हजार ४ सय ७० वटा सवारीसाधन कारवाही गर्दा ८ लाख २५ हजार राजश्व संकलन भएको छ । भदौ महिनामा १ हजार ९ सय ८५ वटा सवारी साधन कारवाहीमा परेका थिए । जसमा १० लाख ६१ हजार राजश्व संकलन भएको छ । यस्तै असोजमा १ हजार ६ सय ५० सवारीसाधन कारवाही गर्दा ९ लाख ३१ हजार ५ सय राजश्व संकलन भएको कार्यालय प्रमुख ज्ञवालीले बताउनुभयो । उहाँका अनुसार, कार्तिक महिनामा १ हजार ९ सय १२ वटा सवारीसाधन कारवाहीमा परेका छन् ।
जसमा १० लाख ८८ हजार ५ सय राजश्व संकलन भएको छ । मंसिरमा १ हजार ७ सय ४० वटा सवारी साधन कारवाहीमा पर्दा ९ लाख ९७ हजार ५ सय राजश्व संकलन भयो । पुषमा १ हजार ५ सय ६२ सवारीसाधन कारवाही गर्दा ८ लाख ८४ हजार ५ सय, माघमा १ हजार ४ सय ४५ सवारी साधन कारवाहीमा पर्दा ८ लाख २४ हजार ५ सय, फागुनमा १ हजार ६ सय ६४ सवारीसाधन कारवाही गर्दा ९ लाख ३४ हजार, चैतमा १ हजार ७ सय ४० सवारीसाधन कारवाहीमा पर्दा १० लाख ६ हजार, बैशाखमा ९ सय ९१ सवारी साधन कारवाहीमा पर्दा ५ लाख ८३ हजार ५ सय, जेठमा ४ सय ९३ सवारी साधन कारवाही गर्दा २ लाख ९७ हजार ५ सय र असारमा १ हजार २ सय ८७ सवारी साधन कारवाही गर्दा ७ लाख १५ हजार राजश्व संकलन भएको छ । चैत, बैशाख र जेठमा लकडाउनका कारण सवारी साधन कम चल्दा अन्य महिनाको तुलनामा कम राजश्व देखिएको हो ।
दुर्घटनाबाट हुने मानवीय क्षती घट्यो
आर्थिक वर्ष ०७६÷०७७ भन्दा आर्थिक वर्ष ०७७÷०७८ मा दुर्घटना बढी भए । तर दुर्घटनाबाट हुने मानवीय क्षती भने कम भएको छ । ०७६÷०७७ मा ८३ वटा सवारी दुर्घटनामा ३८ जनाले ज्यान गुमाएका थिए । जसमा १ सय २ जना घाइते भएका थिए । आर्थिक वर्ष ०७७÷०७८ मा भने ८९ वटा सवारी दुर्घटना भएका छन् । जसमा ३७ जनाले ज्यान गुमाएका छन् । १ सय ४० जना घाइते भएको प्रमुख ज्ञवालीले बताउनुभयो । उहाँका अनुसार सबैभन्दा धेरै दुर्घटना मोटरसाइकलले गराउने गरेको तथ्याङ्कले देखाएको छ ।
दुर्घटना न्यूनीकरणका लागि सचेतिकरण
दुर्घटना न्यूनीकरणका लागि जिल्ला ट्राफिक कार्यालयले विभिन्न खाले सचेतिकरणका कार्यक्रम गर्दै आएको छ । चालक, सहचालकलाई प्रशिक्षण दिने देखि ट्राफिक नियमका बारेमा विद्यार्थीहरुलाई समेत जानकारी गराउने काम भइरहेको ज्ञवालीको भनाइ छ । उहाँका अनुसार चालक, सहचालक र धनीगरी ६ हजार २ सय ७७ जनालाई आर्थिक वर्ष ०७७÷०७८ मा ८९ पटक प्रशिक्षण दिइएको छ ।
यस्तै ५ हजार ८ सय १० जना विद्यार्थी र ५ हजार ३ सय ६० जना सर्वसाधरणलाई ट्राफिक नियमबारे प्रशिक्षण दिइएको छ । ‘यसमा हामीले खास सडकमा पैदल हिड्दा कुन लेनमा हिड्ने ? सडक वारपार गर्दा कसरी गर्ने ? जेब्रा क्रसिङ के हो ?लगायतका बारेमा जानकारी दिने गरेका छौं–‘ज्ञवालीले भन्नुभयो–‘यसले सवारी दुर्घटना न्यूनीकरणमा सहयोग पु¥याउने हाम्रो विश्वास छ ।’
ट्राफिक प्रहरीले विभिन्न समयमा जनचेतनामुलक पर्चा पम्पलेटहरु समेत वितरण गर्ने गरेको जनाएको छ । गएको आर्थिक वर्षमा मात्रै १० हजार ६ सय ५० वटा जनचेतनामुलक पर्चा पम्पलेट वितरण गरिएको उहाँको भनाइ छ । यस्तै दुर्घटना बढी हुने स्थानमा ‘दुर्घटना ग्रस्त क्षेत्र’ लेखिएका बोर्डहरु राख्ने काम समेत भएका छन् ।
‘दुर्घटना बढी हुने स्थानहरुको पहिचान गरी ८ स्थानमा यस्ता बोर्डहरु राखिएका छन् उहाँले भन्नुभयो–‘गुलरिया, राजापुर, मैनापोखर, बासगढीलगाायतका स्थानहरुमा बोर्डहरु लगाउने काम भएको छ ।’ यस्तै आफु खुसी सवारीको स्वरुप परिवर्तन गर्ने कार्यलाई पूर्णरुपमा नियन्त्रण गरिएको छ । क्षमता भन्दा बढी यात्रु तथा मालसामान बोकी हिड्ने र बिना परमिड चल्ने सवारीसाधनलाई निरुत्साहीत गरिएको प्रमुख ज्ञवालीले बताउनुभयो ।
Discussion about this post