चितवन चैत १० गते ।
नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी तीन तहकै चुनावमा नेपाली कांग्रेससँग गठबन्धन हुने दाबी गरेका छन्।
स्थानीय तहको निर्वाचनको मिति घोषणा भएपछि पहिलोपटक बिहीबार गृह जिल्ला चितवन आएका प्रचण्डले स्थानीय तहको चुनावमा पनि केन्द्रबाट नै गठबन्धन हुने बताए। चुनावी गठबन्धनको विषयमा चितवन कांग्रेसले भनेर केही नहुने उनले बताए।
‘गठबन्धन त भइरहेकै छ नि। अहिलेकै गठबन्धन स्थानीयमात्र होइन प्रादेशिक र संघीय चुनावसम्म पनि रहन्छ’, उनले भने।
चितवनमा कांग्रेसले एक्लै लड्ने भनेको छ नि भन्ने प्रश्नमा उनले भने, ‘चितवन कांग्रेसले भनेर केही हुँदैन।’
प्रचण्डको निर्वाचन क्षेत्र माडीका विभिन्न स्थानमा आयोजित कार्यक्रममा सहभागी हुन प्रचण्ड बिहीबार चितवन आएका हुन् । प्रचण्ड शुक्रबारमात्रै काठमाडौँ फर्कने छन्।
ADVERTISEMENT
Discussion about this post