बाँके जेठ २७ गते ।
जिल्ला समन्वय समिति बाँकेको प्रमुखमा नेपाली कांग्रेसका ज्ञानेन्द्र कुमार चौधरी निर्वाचित हुनुभएको छ ।
जनता समाजवादी पार्टी (जसपा) नेपालका उमेश कुमार कुर्मीलाई पराजित गर्दै चौधरी प्रमुखमा निर्वाचित हुनुभएको हो । चौधरीले १३ मत र कुर्मीले ३ मत पाउनुभयो ।
यस्तै महिला सदस्यमा जसपाबाट नेपालगन्ज ५ की तरुन्नुम बानो शेष, माओवादी केन्द्रबाट नेपालगन्ज ४ की रेवती दमाई र नेकपा एकीकृत समाजवादीबाट बैजनाथ ५ की चमेली थरुनी निर्वाचित हुनुभएको छ ।
नवनिर्वाचित चौधरीले पालिकासँग समन्वय र सहकार्य गरेर अघि बढ्ने प्रतिबद्धता जनाउनुभएको छ । चौधरी यसअघि जिल्ला समन्वय समितिमा उपप्रमुख हुनुहुन्थ्यो ।
अघिल्लो कार्यकालमा उपप्रमुख भएर निर्वाह गरेको अनूभवलाई समेत मध्यनजर गरेर अनुगमनलाई प्रभावकारी बनाइने बताउनुभयो । यस्तै निर्विरोध नवनिर्वाचित उपप्रमुख सीता कार्कीले पनि सबै पालिकासँग समन्वय र सहकार्य गरेर अघि बढ्ने बताउनुभयो ।
उहाँले नीति, नियम र कानुन अनसार कार्य गरिने बताउनुभयो । जिल्ला समन्वय समितिमा काँग्रेसले स्पष्ट वहुमत हासिल गरेको छ ।
सत्ता गठबन्धन दलहरुबीच भएको भागबण्डालाई अस्विकार गरेको जसपाले प्रमुख र महिला सदस्यमा छुट्टै उम्मेदवारी हालेको थियो ।
Discussion about this post