बाँके असार १६ गते ।
कोहलपुर नगरपालिकाले भूमि आयोगसँगको समन्वयमा नगरभित्रका वडाहरुका अव्यवस्थित जग्गा नापजाँच कार्य सुचारु गरेको छ । वर्षौँदेखि लालपुर्जाविहीन अवस्थामा बसोबास गरिरहेका नागरिकलाई लक्षित गरेर जग्गा नापजाँच सुरु गरिएको हो ।
नगरपालिकाका अनुसार अहिले कोहलपुर नगरपालिका वडा नम्बर ५ र ८,५ मा नापजाँच सुरु भएको छ भने २,१० र १२ मा नापजाँच सकिएको छ । कोहलपुर नगरपालिका राष्ट्रिय भूमि आयोग संकलन ईकाइ प्रमुख वीरबहादुर विकले वडा नम्बर ८ मा नगर प्रमुख उपप्रमुखसहितको उपस्थितिमा हिजोबाट जग्गा नापजाँच सुरु भएको बताए ।
उनले अहिलेसम्म तीनवटा वडामा नापजाँच सकिएको छ ।चालु आर्थिक वर्षमा सक्ने लक्ष्य थियो तर लक्ष्य पूरा भएन । अर्को आर्थिक वर्षमा जग्गा नापजाँच सम्पन्न हुने र त्यस लगत्तै वडा नम्बर ३, ४ र ६ मा नापजाँच सुरु हुने बताए । त्यसपछि क्रमशः बाँकी वडाहरुमा आयोगले जग्गा नापचाँजको काम सुरु गर्नेछ ।
कोहलपुरमा १६ हजार पाँच सयजना भूमिहीन सुकुम्बासी, भूमिहीन दलित तथा अव्यवस्थित बसोबासीहरुको फाराम संकलन गरिएको र्ईकाइ कार्यालयले जनाएको छ ।
उनले विभिन्न वडामा वन तथा राष्ट्रिय निकुञ्जको अवरोध र कानुनी अड्चनका लागि समस्या देखिएको समाधानको पहल भइरहेको र स्थानीय सरकार र यहाँका राजनीतिक दलहरु एकजुट हुँदै यहाँको समस्या प्रधानमन्त्री तहसम्म सुनाएको बताए ।
कोहलपुर नगरपालिकाका नगर प्रमुख पूर्णप्रसाद आचार्य नगरपालिका भूमिहीन सुकुम्बासी, भूमिहीन दलित तथा अव्यवस्थित बसोबासीहरुलाई लालपुर्जा वितरणका लागि दिनरात प्रयासरत भएको बताउँछन् ।
उनले लालपुर्जा वितरणको लागि सबै सरोकारवाला निकायहरुबीच एकमत भएको भन्दै छिट्टै लालपुर्जा वितरण गर्नेगरी नगरपालिकाले काम गरिरहेको बताएका छन् । बर्षौदेखी अव्यवस्थित जग्गामा बस्दै आएका स्थानिय जग्गा नापजाँच हुदा पनि निकै खुसी भएको हुदा स्थानियको हातमा जग्गाधनी पुर्जा दिलाएर त्यो हासो सदैब कायम राख्ने आफ्नो दायित्व रहेको बताएका छन् ।
Discussion about this post