बाँके कात्तिक १० गते ।
अख्तियार दुरुपयोग अनुसन्धान आयोगको कर्मचारी भएको भन्दै ठगी गर्ने एक जनालाई बाँके प्रहरीले पक्राउ गरेको छ ।
आयोगको कर्मचारी भन्दै विभिन्न सरकारी तथा गैरसरकारी कार्यालयबाट सुविधा लिँदै आएका भरतपुर महानगरपालिका १२, चितवन घर भई हाल नेपालगन्ज उप–महानगरपालिका २० राँझामा बस्दै ३७ वर्षीय मोहन कोइरालालाई पक्राउ गरि अनुसन्धान गरिरहेको बाँके प्रहरी प्रवक्ता डिएसपी नारायण डाँगीले जानकारी दिए ।
कोइरालाले विगत केहि समयदेखि बाँकेका विभिन्न सरकारी कार्यालय तथा संघ संस्थालाई आफू अख्तियार दुरुपयोग अनुसन्धान आयोगको कर्मचारी भनी सुविधा लिने गरेको सूचनाको आधारमा अख्तियार दुरुपयोग अनुसन्धान आयोगको कार्यालय वुटवल, सम्पर्क कार्यालय नेपालगन्ज र जिल्ला प्रहरी कार्यालय बाँकेको प्रहरी टोलीले उनलाई शुक्रवार पक्राउ गरेको डिएसपी डाँगीले बताए ।
‘निगरानी गर्ने क्रममा कोइरालाले सरकारी कार्यालय र संघसंस्थासँग रकम असुली गरेको पुष्टि भएपछि नियन्त्रणमा लिइएको छ,’ डाँगीले भने ।
सोधपुछ गर्दा कोइरालाले आयोग तथा जिल्ला प्रहरी कार्यालयबाट खटिएका प्रहरीलाई गाली गलौज गर्नुका साथै काम कारबाहीमा समेत अवरोध गरेको हुँदा उनलाई नियन्त्रणमा लिई अनुसन्धान भइरहेको प्रहरीले जनाएको छ ।
‘कोइरालाबाट कोहि ठगिएको भए वा निजले कोही कसैलाई भ्रममा पारी झुट्टा आश्वासन दिई लाभ लिएको भए जिल्ला प्रहरी कार्यालयमा उजुरी दिन अनुरोध गरिएको छ,’ डिएसपी डाँगीले जारी गरेको प्रेस नोटमा उल्लेख छ ।
Discussion about this post