बाँके मंसिर २३ गते ।
भ्रष्टाचार विरुद्ध शनिवार नेपालगन्जमा वाकाथन (पैदलयात्रा) गरिएको छ । भ्रष्टाचारविरुद्धको अन्तर्राष्ट्रिय दिवसको अवसर पारेर नेपालगन्जमा तेस्रो वाकाथन गरिएको आयोजक बास नेपालका कार्यकारी निर्देशक नमस्कार शाहले बताए ।
‘भ्रष्टाचार विरुद्ध सँगै हिँडौं’ भन्ने मूल नारासहित गणेशमान चोकबाट सुरु भएको वाकाथनमा करिव एक हजार सर्वसाधारण, कर्मचारी र विद्यार्थीको सहभागिता रहेको थियो । नेपालको राष्ट्रिय झण्डासहित सडकमा निक्लिएका सर्वसाधारण, विद्यार्थी र कर्मचारीले भ्रष्टाचार विरोधी गीतमा नाँचेका थिए । ‘वाकाथनमा नागरिक समाजका अगुवा, सामाजिक अभियन्ता, सुरक्षाकर्मी, विद्यार्थी, खेलाडी, सर्वसाधारण गरि पाँच सयको सहभागिता रहेको थियो,’ उनले भने ।
उक्त वाकाथन वीपी चोकहुँदै धम्बोेझी चोकमा पुगेर कोणसभामा परिणत भएको थियो । झण्डै एक किलोमिटर वाकाथनमा बाँकेका प्रमुख जिल्ला अधिकारी श्रवणकुमार पोखरेल, प्रहरी प्रमुख सुभाष चन्द बोहरा लगायतले ऐक्यवद्धता जनाएका थिए । भ्रष्टाचार विरुद्ध अभियान चलाउँदै आएको बासले सन् २०२१ बाट हरेक वर्ष वाकाथन आयोजना गर्दै आएको कार्यकारी निर्देशक शाहले बताए ।
Discussion about this post