बाँके पुस ७ गते ।
गरे के हुन्न बस दृढ इच्छाशक्ति हुन पर्छ। कोहलपुर वडा नम्बर १२ चपरगौडी कि शारदा शर्मा पौडेलले छोराले घरव्यवहार धान्छन् र छोरी विहे भै अर्काको घरमा जान्छन् भन्ने नेपाली सोंचाई र परम्परालाई गलत साबित गर्दै आफ्नो कृषी कर्ममा रम्दै गाईपालन गरेर बस्नु भएको छ। उहाँ अहिले ३८ वर्षको हुनुभयो। उहाँका दुई दिदि एक बहिनी र दुई भाईहरु छन् उहाँले स्नातकोत्तरसम्मको अध्ययन गर्नुभएको छ। गाईको हेरचाह, आफू र भाईहरुको पढाई लेखाईमा सानै उमेर देखि लाग्नुभएको शारदा पशुपालनमार्फत् बाँके जिल्लाकै उत्कृष्ठ गाईपालक कृषकको रुपमा परिचित हुनुहुन्छ ।
शारदा सिर्जनशील गाई फार्म सञ्चालन गर्नुभएकि शारदाले हरेक वर्ष ५–६ लाख रुपैयाँ बचत गर्नुहुन्छ। १५ हजार रुपैयाँको लगानीमा १८ वर्ष अगाडी शुरु गरेको गाई फार्मले आज उहाँ र उहाँको परिवारको आर्थिक उन्नति भएको छ भने सामाजिक रुपमा पनि निकै सम्पन्न बनाएको छ । एउटा उन्नत गाई किनेर गाईपालन शुरु गर्नुभएको शारदाले ३२वटासम्म गाई पुर्याउनुभएको छ । प्रतिदिन ७० लिटरसम्म दूध बेच्नुहुन्छ। शारदा अहिले पनि दैनिक ६० देखि ६५ लिटर सम्म दूध विक्री गर्नुहुन्छ । उहाँको एउटै गाईले बिहान बेलुका गरेर २७ लिटरसम्म दूध दिन्छ ।
भारतको आसाममा रोजगारीका क्रममा रहेका बाबुलाई देशमै केही गरौं भनी कन्भिन्स गरेर फर्किएको र त्यस लगत्तै गाईपालन शुरु गरेको बताउँनु हुन्छ । गाईपालन शुरु गर्दा कतिले के गर्लान् र केही समय पाल्छ्न अनि छोड्छ्न भन्थे तर पछि आफू गाईपालनमा सफल भएपछि विभिन्न स्थानबाट गाई पाल्ने तरिका सोध्न आएको कुराले उहाँलाई थप प्रेरित गर्ने गरेको बताउनुहुन्छ । कसले के भन्ला भनेर हामीले गाईपालन थालेका थिएनौं त्यसैले हाम्रो ध्यान काममा मात्र केन्द्रित थियो, समयले सबै ठीक गर्दोरहेछ, अहिले कतिपयले तिमीहरु हाम्रा आदर्श हौ पनि भन्दछन् ।
शारदाको फार्ममा अहिले १६ वटा गाई छन् । त्यसमध्ये ७वटा दुहुना, ५वटा गाभिन, १ बाछो र ४ बाच्छी छन् । २८ वटा गाई यो बीचमा बिक्री गरेको बताउनुहुन्छ । “मानिसहरु आउँछन हामीलाई १–२ वटा गाई देउ भन्छन्, त्यसैले बिक्री गरेको बताउनु हुन्छ।“ तिमीले पालेको गाई लैजान पाए मेरो पनि उन्नति हुन्थ्यो कि भन्ने चाहना भेटिन्छ कतिपयमा । उचित स्याहार सम्भार गर्ने भएकाले आफ्ना गाईहरु नियमित रुपमा ब्याउने गरेकाले बढिहाल्छन् नि भनेर गाई बिक्रीलाई पनि व्यवसायकै एउटा पाटो मानेको बताउनुहुन्छ । आफ्नो जमिनले नपुगेर उहाँले नजिकै रहेको छिमेकी वडामा जमिन भाडामा लिएर पनि घाँस लगाउनुभएको छ।
गाई फार्ममार्फत् आएकै पैसा उहाँको परिवारले विभिन्न काममा लगाएको छ । गाई व्यवसायकै पैसाबाट चप्परगौडीमा घर बनाएको, भाईहरुले र आफूले पनि स्नातकोत्तर सम्मको अध्ययन गरेको, वर्दियामा २ विघा जग्गा किनेको, कोहलपुरको एनटिभी रोडमा घडेरी किनेको, एक भाईको विवाह सम्पन्न गरेको बताउँनुहुन्छ । गाईपालन व्यवसायलाई राम्रो ढंगले अघि बढाएपछि गाई फार्मलाई विभिन्न सरकारी निकायले पनि सहयोग र प्रोत्साहन गरको बताउनुभयो।
सरकारले जिल्ला पशुसेवा कार्यालयमार्फत् २०७० सालमा यूवालक्षित कार्यक्रम अन्तर्गत् २ लाख रुपैयाँ अनुदान दिएको छ भने पशु प्रजनन् केन्द्रले गोठ सुधारका लागि २० हजार रुपैंयाँ दिएर उहाँलाई प्रोत्साहित गरेको छ । पशुसेवा कार्यालयले गोबर फ्याक्ने हुविल ब्यारो दिएको छ, उहाँ भन्नुहुन्छ,– गाईलाई खुवाउने घाँसका वीउहरु नियमित रुपमा पशु सेवा कार्यालयले हाम्रो घरसम्मै ल्याइदिन्छ । शारदाको घरमा अहिले गाईपालनबारे सल्लाह, सुझाव र परामर्श लिन कोहलपुरका स्थानीय मात्र होइनन् नेपालगञ्ज, वर्दियालगायतका विभिन्न ठाउँबाट मानिसहरु आउँछन् ।
सबैलाई म झर्को नमानी निःशुल्क रुपमै सल्लाह,सुझाव दिन्छु, शारदा भन्नुहुन्छ– विदेश गएर कमाएको भन्दा बढी घरै बसेर गाइपालन गरेर कमाउन सकिन्छ । उहाँले विदेश गएकाहरुका आफन्तलाई पनि आफूले आफन्तलाई घर फर्काउ र गाईपालन गर भनेर सुझाव दिएको बताउनुहुन्छ ।उहाँले मेहनत र पसिना बगाउनेहरुको लागि नेपालकै माटोमा सुन फलाउन सकिने बताउदै नेपाल सरकारले हामी जस्ता कृषकलाई अनुदान भन्दा सामाग्रीहरुमा सौलियत र छुट दिए कृषकलाई राहत पुग्ने बताउदै उहाँले आफ्ना सुझाब सरकार समक्ष पुर्याइदिन हामिलाई आग्रह समेत गर्नुभएको छ।
उहाँले अनुदानको नाममा कहिले पनि कृषिकर्म नगरेकाहरु राजनीति पावर र आस्थाको भरमा लाखौको अनुदान कुम्लाउने अनि अनुदान पाएसी कृषीकर्म नगर्ने बस अनुदानकै लागि देखावटी गर्ने हुँदा आफुजस्तै अन्य कृषकहरुलाई मर्का परेको बताउनुहुन्छ। अब बन्ने नीति तथा कार्यक्रममा संघीय सरकार प्रदेश सरकार या स्थानीय सरकारले कृषकलाई अनुदान होइन दाना र मल अनि आवस्यकत पर्ने सामाग्री कृषकको अवस्था पहिचान गरि कि त निशुल्क बितरण गरोस होइन भने कृषकलाई सौलियत हुने खालको कार्यक्रम ल्यावोस भन्ने उहाँको सुझाब रहेको छ।
नेपाल कृषि प्रदान देश भएपनी पछिल्लो समय देशको अस्थिर राजनिती अनि व्यवस्थाले कृषि गर्ने हरुमा नि नैरश्यता छाउदै गएको छ। कृषीकर्ममा रमाउनेको लागि सरकारले केही नयाँ योजना ल्याएर कार्यन्वयन गरोस भन्ने चाहना शारदा जस्तै हजारौ कृषक दाजुभाई दिदिबहिनीहरुको छ।
Discussion about this post