बाँके फागुन १८ गते ।
बाँकेको राप्तीसोनारी गाउँपालिका –१ बैरीयाका स्थानीयलाई अब बर्षायाममा हुने बिपतका बेला सहज हुने भएको छ । बिपत प्रतिकार्य पूर्वतयारी कार्यक्रम अन्तर्गत समुदायमै अग्लो, बलियो र भूकम्प प्रतिरोधि दुई कोठे भवन बनेपछि स्थानीय क्षेत्रबहादुर कुमालले खुसी ब्यक्त गरे ।
उनले जस्तै भवन निर्माण समितिका अध्यक्ष समेत रहेकी स्थानीय राम कुमालले पनि गाउँबाट दुईसय मिटरमै राप्ती नदी भएको र नदीले क्षति गर्दा अनाज राख्ने ठाउँ समेत नहुँदा बर्षेनी समस्या हुनेभएकोमा यसपालिदेखि राहत हुने बताइन् । उनले यो भवनले वैरीयाका ३२ घरलाई प्रत्यक्ष सहयोग पुग्ने बताइन् । अर्का स्थानीय चन्द्रबहादुर कुमालले बाढीबाट हुने क्षति कम हुनेमा भवन बनेपछि आफू ढुक्क भएको बताए ।
स्थानीयलाई बाढीबाट हुने क्षतिबाट जोगाउन स्थानीय स्रोत साधनको समेत प्रयोग गरी चुनारहित मिश्रित सुधारिएको माटो प्रविधिको प्रयोगबाट भवन निर्माण गरिएको प्राबिधिक संयोजक रुपेश श्रेष्ठले जानकारी दिए । उनका अनुसार सो भवनमा विपद व्यवस्थापनका सामाग्री राख्नुका साथै कुनै कार्यालय समेत सञ्चालन गर्न सकिने जानकारी दिए ।
सिआरएस नेपालको आर्थिक सहयोग तथा कारितास नेपालको सहकार्यमा ८ लाख ८७ हजार ७ सय २ रुपियाँ लागतमा भवन निर्माण सम्पन्न भएको संयोजक श्रेष्ठले जानकारी दिए ।
Discussion about this post