बाँके फागुन १८ गते ।
सशस्त्र द्वन्द्वमा विस्थापित भएका बाँकेका छोटी भन्सार अझै पुनःस्थापित हुन सकेका छैनन् । विस्तृत शान्ति सम्झौता भएर पनि मुलुक शान्ति प्रक्रियामा प्रवेश गरेको डेढ दशक वितिसक्दा पनि सशस्त्र द्वन्द्वमा विस्थापित भएका छोटी भन्सार पुनःस्थापित हुन नसकेका हुन् । जसका कारण सरकारको कराडौं राजश्व खेर गइरहेको छ । छोटी भन्सार पुनःथापना गर्नुपर्ने माग गर्दै बाँकेका उद्योगी व्यवसायीले सरकारसँग आग्रह गरेका छन् ।
स्थानीय उद्योगी व्यवसायीले जिल्लाका विभिन्न नाकामा छोटी भन्सार नहुँदा अवैध आयात र तस्करी खुला रूपमा हुनेगरेको गुनासो गर्दै तत्काल छोटी भन्सार पुनःथापना गर्दै नाकामा कडाइ गर्न सरकारसँग आग्रह गरेका हुन् । केही दिनअघि नेपालगन्ज भ्रमणमा आएका उपप्रधान तथा गृहमन्त्री नारायणकाजी श्रेष्ठलाई ज्ञापनपत्र बुझाउँदै नेपालगन्ज उद्योग वाणिज्य संघले सो माग गरेको संघका अध्यक्ष टङ्क धामीले स्मरण गराए ।
उनले केही वर्षदेखि पटक–पटक छोटी भन्सार पुनःथापनाको माग गर्दै आए पनि सुनुवाइ नभएको जनाउँदै छोटी भन्सारहरू नहुँदा एकातिर अवैध आयात बढेर नेपालगन्जको व्यापार व्यवसाय प्रभावित भएको र अर्कोतिर ठुलो परिमाणमा राजस्व चुहावट भइरहेको बताए ।
उपप्रधान तथा गृहमन्त्री श्रेष्ठलाई संघद्वारा बुझाइएको १४ बुँदे ज्ञापनपत्रमा सशस्त्र द्वन्द्वको समयमा बन्द गरिएका जिल्लाका सबै छोटी भन्सार स्थापना गरेर राजस्व सङ्कलन बढाउनुका साथै अवैध आयातमा नियन्त्रण गर्न माग गरिएको छ । नेपालगन्ज उद्योग वाणिज्य सङ्घका अध्यक्ष टङ्क धामी र महासचिव भीमबहादुर रानाभाटले हस्ताक्षर गरी बुझाएका थिए । सो ज्ञापनपत्र सरकारी गाडीमै भन्सार छलेर सामान ल्याउने गरिएको गुनासो गर्दै रोक्न माग गरिएको छ ।
सरकारी अधिकारीहरू नै गाडी लिएर सीमावर्ती भारतीय बजार जाने गरेकाले सो विषयमा तत्काल ध्यानाकर्षण होस् भन्ने ज्ञापनपत्रमा उल्लेख छ । यसैगरी सो ज्ञापनपत्रमा नेपालबाट भारत जाने र भारतबाट नेपाल आउने सबैलाई भारतीय सीमा सुरक्षा बल एसएसबीलेजस्तै अनिवार्य रूपमा परिचयपत्र चेकजाँच गर्ने व्यवस्था गर्न माग गरिएको छ ।
त्यस्तै, सीमामा एक्स–रे र फेस रिडर मेसिन जडान गरी कार्यान्वयनमा ल्याउन समेत माग गरिएको छ । उपप्रधान तथा गृहमन्त्री श्रेष्ठले राजस्व चुहावट रोक्ने सवालमा सरकार गम्भीर र कडा रूपमा अघि बढेको जनाउँदै यो नाकबारेमा बुझेर आवश्यक व्यवस्था गरिने आश्वासन दिलाउनुभएको नेपालगन्ज उद्योग वाणिज्य संघका अध्यक्ष धामीले बताए ।
Discussion about this post