रमजानको १९ औँ दिन : नेपालगन्जका १५ सयले गरे सामुहिक इफ्तार

बाँके चैत १७ गते ।
रमजानको १९ औँ दिनको बेलुकी नेपालगन्जमा सामुहिक इफ्तार गरिएको छ । सामुहिक इफ्तार कार्यक्रममा नेपालगन्ज र आसपासका एक हजार पाँच सय इस्लाम धर्मावलम्वी सहभागी भएको आयोजक खिदमत ग्रुपका सदस्य समेत रहेका नेपालगन्ज उपमहानगरपालिका वडा नं. ५ का वडा अध्यक्ष सराफत हुसैन शेषले बताए ।

इस्लाम धर्मावलम्बीको पवित्र पर्व रमजान २९ फागुनदेखि सुरु भएको हो । रमजान महिनामा पानीसमेत नखाएर निहार ब्रत बस्ने गरिन्छ । रमजानको १९ औँ दिनमा नेपालगन्ज उपमहानगरपालिका ५ स्थित मजेष्टिक पार्टी प्यालेसमा आयोजना भएको सामुहिक इफ्तारमा दिनभर निराहार व्रत बसेकाहरु सहभागी भएको उनले बताए ।

इफ्तारमा सहभागी भएकाहरुलाई विरयानी र पानी खुवाइएको खिदमत ग्रुपका अर्का सदस्य अस्फाक अन्सारीले बताए । उनले सामाजिक सेवा अन्तरगत ग्रुपले सामुहिक इफ्तार कार्यक्रम लगायत दसैँको दुर्गा मूर्ती विसर्जनका बेला र्यालीमा सहभागी हिन्दू धर्मावलम्वीलाई पानी, मिठाई र फलफूल वितरण गर्दै आएको बताए ।

यसअघि ११ औँ दिनमा पनि नेपालगन्ज उपमहानगरपालिका ५ स्थित राप्तीरोडमा सामुहिक इफ्तार गरिएको थियो । उक्त इफ्तारमा तीन हजार बढिले सामुहिक इफ्तार गरेका थिए । नेपालगन्जमा यो नै सवैभन्दा धेरै जना सहभागी भएको इफ्तार कार्यक्रम थियो ।