बाँके चैत २३ गते ।
राप्ती सोनारी गाउँपालिकाका अध्यक्ष तप्त बहादुर पौडेलले निकुञ्ज तथा मध्यवर्ती क्षेत्रमा पर्ने खोलाहरुको नदीजन्य पदार्थहरुको व्यवस्थापन गर्न सुझाव दिएका छन् । बाढी र डुवानको उच्च जोखिममा रहेको राप्ती सोनारीमा चुरेबाट बग्दै आएको नदीजन्य पदार्थको व्यवस्थापन जरुरी रहेको बताए ।
उनले भने–‘खोलाको सतह जमिनको सतह भन्दा माथि हुँदा बस्तीहरु डुवानमा पर्ने गर्छन् । खोलाको सतह माथि हुँदै जाँदा सडक तथा पुलहरुमा समेत त्यसको असर देखिन थालेको छ ।’ राप्ती सोनारी गाउँपालिका विपदको उच्च जोखिममा पर्छ । विपदमा पनि सबैभन्दा बढी बाढीबाट प्रभावित हुने गरेको छ ।
बाँके राष्ट्रिय निकुञ्ज छ । राष्ट्रिय लोकमार्ग पनि छ । मध्यवर्ती क्षेत्रका खहरे खोलाहरु छन् । ‘कुनै यस्तो वर्ष छैन जहाँ राप्ती नदी र खहरे खोलामा आउने बाढीले राप्ती सोनारीका तटिय क्षेत्रका बस्तीहरुमा क्षती नपुगेको होस् उनले भने–‘यसको नियन्त्रण र व्यवस्थापन भने कै नदीजन्य पदार्थहरुको व्यवस्थापन हो ।’ बाढी र डुवान नियन्त्रणका लागि उनले वैज्ञानिक अध्ययन गरिनुपर्ने बताए । ‘बाढी र डुवान नियन्त्रणका लागि अव अध्ययन जरुरी छ ।
त्यो अध्ययनका आधारमा नीति बनाइनु पर्छ उनले भने–‘वैज्ञानिकरुपमा कसरी व्यवस्थापन गरिनु पर्ने हो त्यसको खोजी गरिनु पर्छ । जवसम्म निकुञ्ज र मध्यवर्ति क्षेत्रमा पर्ने खोलाहरुको पदार्थ व्यवस्थापन गरिँदैन तवसम्म डुवानको समस्या समाधान हुँदैन र थप क्षती हुने जोखिम बढ्छ ।’ उनले वैज्ञानिकरुपमा उत्खनन् गरेर व्यवस्थापन गरिनु पर्नेमा जोड दिए । उनले भने–‘विकास निर्माणका कामहरु धमाधम भइरहेको छ ।
त्यहाँ यसको सदुपयोग गरिनु पर्छ । कम्तीमा यहाँको समस्यामा पनि समाधान हुने, विकास निर्माणका काममा पनि सहजता ल्याउने र राज्यलाई राजस्वमा समेत टुवा पुग्ने हुन्छ ।’ मध्यवर्ती क्षेत्रमा आधा दर्जनबढी खोलाहरु छन् । ती खोलाहरु राप्ती नदीमा मिसिने गरेका छन् । मानव वस्तीलाई छुने ती खोलाहरुमा वर्षायाममा आउने बाढीले ठूलो क्षती गर्ने गरेका छन् ।
Discussion about this post