बाँके चैत २४ गते ।
कोहलपुर नगरपालिकाले स्वास्थ्य वीमा कार्यक्रमलाई प्रभावकारी गराउने विषयमा सेवा प्रदायक निकायसँग छलफल गरेको छ । कोहलपुर नगरपालिका र नेपालगन्ज मेडिकल कलेज शिक्षण अस्पताल कोहलपुरबीच कोहलपुर नगर अस्पतालबाट अव विशेषज्ञ सेवा दिने सम्झौता भइसकेको छ ।
कोहलपुर नगरपालिका स्वास्थ्य वीमा संयोजन समितिले कोहलपुर नगरसभा हलमा आयोजना गरेको अन्तरक्रिया कार्यक्रममा स्वास्थ्य वीमा कार्यक्रमलाई थप प्रभावकारी कसरी गराउन सकिन्छ भन्ने विषयमा सघन छलफल गरिएको समितिका सदस्य समेत रहेका वडा अध्यक्ष वीरेन्द्र कुमार शाहले जानकारी दिए । स्वास्थ्य वीमा वोर्डमा सूचिकृत मेडिकल कलेज कोहलपुरका चिकित्सकहरुले नगर अस्पतालबाट तीन दिन विशेषज्ञ सेवा प्रदान गर्दैछन् ।
स्वास्थ्य वीमामा समेटिएका बिरामीहरुलाई उनीहरुले प्राप्त गर्ने स्वास्थ्य सेवालाई सहज, सरल र गुणस्तरीय बनाउने सवालमा मेडिकल कलेजले प्रतिबद्धता जनाएको छ । कलेजका निर्देशक डा.सुरेश कुमार कनोडियाले स्वास्थ्य सेवा सहज तरिकाले प्रवाह गर्ने सवालमा मेडिकल कलेज प्रतिबद्ध रहेको बताए ।
समितिका संयोजक समेत रहेका कोहलपुर नगरपालिकाका नगर प्रमुख पूर्ण प्रसाद आचार्यले कोहलपुर नगरपालिकाले नगरबासीको स्वास्थ्यमा सहज पहुँच स्थापित गर्नका निमित्त प्राथमिकताका साथ काम गरिरहेको उल्लेख गरे । उनले कोहलपुर नगरपालिकाले स्वास्थ्य वीमा कार्यक्रमलाई तत्काल कार्यान्वयनमा लैजाने ढंगले अगाडि बढेको भन्दै मेडिकल कलेजले बिरामीहरुको सहज उपचारमा ध्यान दिनुपर्ने बताए । उनले अस्पतालमा पुग्ने बिरामीहरुले छिटोछरितो र गुणस्तरीय उपचार सेवा पाउन नसकेको गुनासो आएको भन्दै त्यसतर्फ ध्यान दिन मेडिकल कलेजको ध्यानाकर्षण समेत गराए ।
नेपालगन्ज मेडिकल कलेज कोहलपुरसँगको सहकार्यमा कोहलपुर नगर अस्पतालबाट विशेषज्ञ सेवा दिन लागिएको कोहलपुर नगरपालिकाका जनस्वास्थ्य निरीक्षक प्रेम पाण्डेले जानकारी दिए । आइतवार प्रसूति तथा स्त्रीरोग विशेषज्ञ सेवा, बुधवार जनरल फिजिसियन र शुक्रबार शल्य चिकित्सा सेवा प्रवाह गर्ने हुनेछ ।
जटिल खालका समस्या देखिएका बिरामीहरुलाई मेडिकल कलेजमा रिफर गरिनेछ । छलफल कार्यक्रममा डा. कनोडियाको नेतृत्वमा मेडिकल कलेजका चिकित्सक तथा कोहलपुर नगरपालिकाको तर्फबाट नगर प्रमुख आचार्यको नेतृत्वमा जनप्रतिनिधि तथा सरोकारवालाहरुको सहभागिता रहेको थियो ।
Discussion about this post