बर्दिया साउन ८ गते ।
हरेक वर्ष वर्षायाममा बर्दियाबाट बग्ने कर्णाली र बबई नदीबाट करोडौँ मूल्यको काठ बगेर भारततर्फ जाने गरेको छ । त्यस्तो काठ नष्ट हुन नदिन कसैले प्रयास गरेका छैनन् ।
डिभिजन वन कार्यालय र बर्दिया निकुञ्जले बहुमूल्य काठ बगेपनि कानूनी अड्चनले काठ रोक्न नसकेको जनाएका छन् । कर्णाली र बबईमा विशेषगरी बर्दिया राष्ट्रिय निकुञ्ज र पहाडी क्षेत्रबाट साल, सिसौ लगायत बहुमूल्य वन पैदावार बगेर जाने गरेको छ । हरेक वर्ष वर्षायाममा हजारौँ साना ठूला रुख बगाएर भारततर्फ लाने गरेको छ ।
स्थानीय स्वायत्त शासन ऐन र वन ऐनबीचको कानूनी अड्चनका कारण बर्दियाबाट बग्ने कर्णाली र बबई नदीबाट करोडौँको वन पैदावार भारत तर्फ बगिरहेको छ । नेपाली भुभागबाट बगेर भारततर्फ जाने वन पैदावार कानूनी जटिलताका कारण आफ्नै मुलुकमा रोक्न नसकिने स्थिति रहेको वनका अधिकारीहरु बताउँछन् ।
नेपाली भु–भागबाट बगेर गएको वन पैदावार भारतीय सीमानामा बगाइएको कर्णाली नदीको बाँध गिरिजापुरीमा संकलन गर्न दुई वर्षका लागि साढे तीन करोड भारुको ठेक्का दिइएको छ । यस वर्ष आएको बाढीले पनि कैयन् रुख बगाएको स्थानीयबासी बताउँछन् ।
गेरुवा गाविस–५ का राम भजन थारु सरकारको स्पष्ट नीति नभएका कारण बगेर गएको काठ संकलन गरे आफूहरुलाई कारबाही हुने गरेको गुनासो गर्छन् । एक दशक अघि साविक जिल्ला विकास समितिले वन मन्त्रालयलाई पत्रचार गरी ठेक्का संकलनको माग गरेको थियो । त्यसबेला मन्त्रिस्तरीय निर्णयले उक्त अधिकार दिने व्यवस्था गरेपनि कार्यान्वयन हुन सकेन ।
Discussion about this post