बाँके कातिक ९ गते ।
विगत ७ वर्ष देखि नेपालगन्ज रंगशालामा खेलाडीहरुले खेल्न पाएका छैनन् । फुटबल खेलाडीले खेल्न नपाउनु दुर्भाग्यपुर्ण अवस्था भएको बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाहीले बताएका छन् ।
२०७६ सालमा नेपालगन्जमा आठौं राष्ट्रिय खेलकुद प्रतियोगिता सम्पन्न भएको थियो । राष्ट्रिय खेलकुद प्रतियोगिता आयोजना गर्न एक वर्ष अघि देखि नै नेपालगन्ज रंगशालाको भौतिक पुर्वाधार निर्माण गर्ने भनेर खेलाडीलाई खेल्नबाट बञ्चित गरिएको थियो । पछिल्लो समय नेपालगन्ज रंगशालामा एथ्लेटिक्सको सिन्थेटिक ट्रयाक निर्माणको काम भएका कारण मैदानमा खेलाडीले खेल्न पाएका थिएनन् ।
ट्रयाक निर्माण भएर पनि सरकारलाई हस्तान्त्रण गर्न अघि नै बिग्रिएपछि रंगशालामा राष्ट्रिय खेलकुद परिषदले कसैलाई पनि खेल्न अनुमति दिएको छ । संघका अध्यक्ष भोजराज शाहीले राष्ट्रिय खेलकुद परिषद र युवा तथा खेलकुद मन्त्रालयको निति खेल मैत्री नभएको गुनासो गर्नु भएको छ ।
उनले भने, ‘७ वर्ष भयो फुटबल प्रतियोगता गर्न पाएका छैनौं । यो जस्तो दुःखको कुरा अरु के हुन्छ । बालबालिका कुलत तर्फ फसेको अवस्था छ । बालबालिकालाई प्रशिक्षण गराउन मैदान माग्दा समेत हामीहरुले पाइरहेका छैनौं ।’ बालबालिकाहरुको प्रशिक्षणको लागि भएपनि परिषदले मैदान दिने विश्वास लिएको उनले बताए । शाहीले भने,‘यसका बारेमा क्षेत्रीय खेलकुद, राखेप, जिल्ला प्रशासन कार्यालयलाई जानकारी गराईसकेका छौं ।
हामीलाई आशा छ तिहार पछि बालबालिकाहरुले नेपालगन्ज रंगशालाको मैदानमा फुटबल प्रशिक्षण गर्न पाउनेछन् ।’ राज्यले अर्बौ लगानी गरेर निर्माण गरेको खेलकुदका भौतिक पुर्वाधार व्यवस्थापन कमजोर हुँदा खेलाडीले प्रशिक्षण समेत गर्न पाएका छैनन । नेपालगन्ज रंगशाला यहाँका खेलाडीहरुको लागि प्रमुख प्रशिक्षण केन्द्र हो ।
तर राष्ट्रिय खेलकुद परिषद अन्तर्गतका निकायहरुको खेलाडीप्रतिको उदासिनताका कारण पनि प्रशिक्षणका कार्यक्रम प्रभावित हुने गरेका छन् । पछिल्लो समय नेपालगन्ज रंगशालामा खेलाडीहरुले कहिले प्रशिक्षण गर्न पाउँछन भन्ने प्रश्न उठन थालेको छ । यसका लागि खेलाडी, प्रशिक्षक, संघले त्यसमा चासो दिन थालेका छन् ।
राष्ट्रिय खेलकुद परिषद अन्तर्गत मध्यपश्चिम क्षेत्रीय खेलकुद विकास समिति लुम्बिनी प्रदेशको मातहतमा रहेको नेपालगन्ज रंगशालामा हाल कुनै पनि गतिविधि हुन सकेका छैनन् । बाँके जिल्ला फुटबल संघले यसअघि असोज १५ गते देखि एक वर्ष सम्म यु–१२ स्तरको खेलाडीहरुलाई नियमति रुपमा प्रशिक्षण गराउने योजना रहेको बताउँदैं उक्त प्रशिक्षणमा सहयोग गरिदिन शाहीले सम्बन्धित सम्पुर्ण निकायलाई ध्यानाकर्षण गराएको थियो । अब तिहार पछि मैदान पाएपछि प्रशिक्षणको कार्यक्रम गर्ने संघको योजना रहेको छ ।
Discussion about this post