बाँके मंसिर १८ गते ।
रत्न राजमार्ग अन्तरगत कोहलपुर चौराहबाट करिव ६ किलोमिटर उत्तरतर्फ जाने हो भने सुतैया ताल पुग्न सकिन्छ । प्राकृतिक रुपमा सुन्दर यो ताल बैजनाथ गाउँपालिका ३ सुतैयामा पर्दछ । बाँके राष्ट्रिय निकुञ्जको मध्यवर्ती क्षेत्रमा रहेको यो तालमा विभिन्न जातका लोपोन्मुख चराचुरुङ्गीको बसोबास छ । तर, यो ताल संरक्षण अभावमा अस्तब्यस्त बनेको छ । केन्द्र, प्रदेश र स्थानीय सरकारले यसको संरक्षणमा चासो नदिँदा यो ताल फोहरमात्र छैन होहल्ला गर्ने थलो समेत बनेको छ ।
सुतैया तालमा रहेको रुखमा लोपोन्मुख गिद्धले आफ्नो बास बनाएको देख्न सकिन्छ । विभिन्न प्रजातीका चराचुरुङ्गीले तालमा पौडी खेलेको दृश्यले ताललाई मनोरम बनाएको छ ।
करिव पाँच विघा क्षेत्रमा फैलिएको यो प्राकृतिक तालले बाँके र बर्दिया राष्ट्रिय निकुञ्जका जनावरको तिर्खा मेटाउने गरेको छ । प्रचार प्रसार र संरक्षणको अभावमा ओझेल परेको यो ताललाई ब्यवस्थित गर्न सकेको खण्डमा स्वदेशी सँगै भारतीय पर्यटकका लागि राम्रो गन्तब्य बन्न सक्ने देखिन्छ । यसका लागि तीनै तहका सरकारले बेलैमा ध्यान दिन नसक्ने हो भने तालको सौन्दर्य विग्रिने नै छ यसमा बसोबास गर्दै आएका चराचुरुङ्गी समेत लोप हुने पक्का छ ।
Discussion about this post