बाँके पुस २७ गते ।
नेपाल रेडक्रस सोसाईटी सदरलाईन उपशाखा आफ्नै भवनबाट सञ्चालनमा आएको छ । उपशाखा भवनको शुक्रबार प्रतिनिधि सभाका सांसद डा. धवलसम्शेर राणाले एक कार्यक्रमका बीच उद्घाटन गरेका हुन् । रेडक्रस भवनको तत्कालिन नेपालगन्ज उपमहानगरपालिकाको मेयर हुँदा डा. राणाले नै शिलान्यास गरेका थिए ।
नेपालगन्ज उपमहानगरपालिका वडा नम्बर ११ स्थित त्रिभुवन चोक–विपी चोक सडक खण्डमा नवनिर्मित भवन उद्घाटन गर्दै प्रमुख अतिथी डा. राणाले मानविय सेवाका लागि रेडक्रसले खेलेको भूमिका प्रशंसनीय रहेको बताए । रेडक्रस उपशाखालाई आफ्नो तर्फबाट आवश्यक सहयोग गर्ने प्रतिवद्धता पनि उनले जनाए ।
रेडक्रस सदरलाईन उपशाखा सभापति ओमप्रकाश आजादको अध्यक्षतामा सम्पन्न भवन उद्घाटन कार्यक्रममा नेपाल रेडक्रसका पुर्व केन्द्रिय उपसभापति अजितकुमार शर्मा, जिल्ला सभापति गोवद्र्धनसिंह सम्झना लगायतले बोलेका थिए । उपशाखाका सचिव मुबारक अली सिद्धिकीले भवन निर्माणबारे जानकारी गराएका थिए, भने कृष्णादेवी पाण्डेयले कार्यक्रम सञ्चालन गरेकी थिइन् । कुल १६ लाख १६ हजार ४ सय २ रुपैयाँमा भवन निर्माण कार्य सम्पन्न भएको सचिव सिद्धिकीले बताए ।
कानुनी प्रक्रिया पुरा गरेर सरकारको नाममा गएको ‘अपुताली’ जग्गालाई तत्कालिन नेपालगन्ज उपमहानगरपालिका वडा नम्बर ११ का वडाअध्यक्ष उज्वलसिंह राठौंरको सक्रियता एवम सिफारिसका आधारमा उपमहानगरपालिका कार्यालयले भोगाधिकार स्वरुप करिव २ धुर क्षेत्रफल रहेको उक्त जग्गा रेडक्रस सदरलाईन उपशाखालाई दिएको थियो ।
रेडक्रस जिल्ला शाखा बाँकेको कुल १७ वटा उपशाखा रहेका छन् । यि मध्ये ९ वटा उपशाखाले आफ्नै भवनबाट कार्य सञ्चालन गर्दै आएका छन् भने ३ वटा उपशाखाको भवन निर्माणाधिन अवस्थामा छन् ।
Discussion about this post