नेपालगन्ज उपमहानगरपालिका २० का वडा अध्यक्ष धोवीको फोटो सामाजिक संजालमा भाइरल

बाँके चैत २८ गते।
नेपालगन्ज उपमहानगरपालिका वडा नं. २० का वडा अध्यक्ष कौशलकुमार धोवीको फोटो यतिबेला सामाजिक संजालमा भाइरल भएको छ । उनले राम्रो काम गरेर उनको फोटो भाइरल भएको भने पक्कै होइन । कार्यालय समयमा नेपालगन्ज उपमहानगरकाका उप–मेयर कमरुद्धिन राईको कार्यकक्षमा रहेको शोफामा सुतेर आराम गरिरहेको उनको फोटो यतिबेला सामाजिक संजालमा भाइरल भएको हो ।

उनी हरेक दिनजसो उप–मेयर राईको कार्यकक्षमा जाने र उक्त कोठामा रहेको शोफामा सुतेर आराम गर्ने गरेको प्रत्यक्षदर्शी बताउँछन् । ‘उहाँ (कौशलकुमार धोवी) हरेक दिन यहाँ आउनु हुन्छ र उपमेयर भएकै बेला समेत शोफामा सुतेर आराम गर्नु हुन्छ,’ एक प्रत्यक्षदर्शीले भने ।

वडा अध्यक्ष धोवीको अधिकांश समय उपमहानगरका उप–मेयर राईको वित्ने भएकोले वडा नं. २० का सर्वसाधारणले हैरानी खेप्न परेको छ । वडा कार्यालयमा नबस्ने भएकोले सेवाग्राहीहरु उपमहानगरको कार्यालयमा आएर कागजातमा दस्तखत गराउन बाध्य छन् । ‘वडा कार्यालयमा कहिलै बस्नु हुन्न । दस्तखत गराउन उपमहानगरका उप–मेयर राईको कार्यकक्षमा आउनु पर्ने बाध्यता छ,’ एक सेवाग्राहीले भने, ‘एक दिनमा हुने काम दुई–तीन दिन लाग्छ । समय र पैँसाको समेत बर्बाद गर्नु परेको छ ।’

जनता समाजवादी पार्टी नेपालबाट वडा अध्यक्षमा जितेका उनले अधिकांश समय उप–मेयर राईको कार्यकक्षमा विताउन थालेपछि जनताले आफ्ना समस्या र गुनासो सुनाउनबाट समेत बञ्चित भएका छन् । वडामा हुने विकास, निर्माणको काममा समेत उनले चासो नदिएको सर्वसाधारणले आरोप लगाएका छन् ।