बाँके जेठ ६ गते ।
बाँकेमा लागु औषधको प्रयोग तथा ओसार पसार बढ्दै गएपछि त्यसको नियन्त्रणका लागि बाँके प्रहरी सक्रिय भएको छ । सादा पोशाकका प्रहरी परिचालन गरेको बाँके प्रहरीले ओसार पसार तथा प्रयोगकर्तालाई एकपछि अर्को गरि पक्राउ गर्न थालेको छ । ‘लागु औषध नियन्त्रणमा कडाईका साथ लाग्ने निर्देशन छ । सोही निर्देशन बमोजिम मातहतका प्रहरी कार्यालयले लागु औषध ओसार पसार तथा सेवनकर्ताको निगरानी गरिरहेका छन्,’ बाँकेका प्रहरी प्रवक्ता समेत रहेका डिएसपी दीपक पातलीले भने ।
मंगलवार मात्र बाँके प्रहरीले ७० ग्राम ७२० मिलिग्राम ब्राउनसुगरसहित दुई जनालाई पक्राउ गरेको छ । जिल्ला प्रहरी कार्यालय बाँके र लागु औषध नियन्त्रण ब्यूरोको टोलीले लागु औषध ब्राउनसुगरसहित दुई जनालाई पक्राउ गरेको हो ।
नेपालगन्ज उपमहानगरपालिका—१२ स्थित बाजेको सेकुवा घरको अगाडीबाट मंगलवार बेलुकी करिव ८ वजेतिर दुई जनालाई पक्राउ गरिएको उनले बताए । पक्राउ पर्नेमा नेपालगन्ज उपमहानगरपालिका—१६ का १९ वर्षीय शमिर बेहना र सोही ठाउँका ३१ वर्षीय जुमाई सिद्धिकी रहेको डिएसपी पातलीले अनलाईन खोजखवरलाई जानकारी दिए ।
बाजेको सेकुवा घरको अगाडी हिडिरहेका उनीहरुलाई जिल्ला प्रहरी कार्यालय बाँकेका प्रहरी सहायक निरीक्षक सुरेन्द्र खत्री र लागु औषध नियन्त्रण ब्यूरो नेपालगन्जका प्रहरी सहायक निरीक्षक नविन शाहीको टोलीले पक्राउ गरेको उनले बताए । गोप्य सुचनाको आधारमा शमिर बेहनाले लगाएको जिन्स पाइन्ट खानतलासी गर्दा उनले लगाएको पाइन्टको गोजीमा ब्राउनसुगर फेला परेको बाँके प्रहरी प्रवक्ता पातलीले जानकारी दिए ।
पक्राउ परेका दुवै जनालाई थप अनुसन्धानका लागि जिल्ला प्रहरी कार्यालयमा राखिएको छ । उनीहरु विरुद्ध लागु औषध ओसार पसार मुद्धा दायर गरिने भएको छ ।
Discussion about this post