बाँके भदौ ५ गते ।
बाँकेमा तस्करी मौलाउँदै गएको छ । तस्करी नियन्त्रणका लागि सशस्त्र प्रहरीले नेपालगन्ज नाका अन्तरगत पर्ने सडकको तीन ठाउँमा चेकजाँच गर्दै आएको छ । सशस्त्र प्रहरीको चेकजाँचले सर्वसाधारणलाई सास्ती भएको छ, तर सशस्त्र प्रहरीका सादा पोशाकमा परिचान भएका घुमुवाको मिलोमतोमा ठूला तस्करलाई मस्ती भएको छ । ‘नाकामा खटिएका सशस्त्र प्रहरीले सर्वसाधारणले घरायसी कामका लागि ल्याउँदै गरेको सामानमा आँखा लगाउँछन्, तर सशस्त्र प्रहरीको मिलोमतोमा ठूला तस्करलाई मस्ती भएको छ,’ एक सर्वसाधारणले भने ।
सशस्त्र प्रहरी बल जयसपुर विओपीमा कार्यरत असई सोमराज शर्मा फेरि घुमुवाको रुपमा सादा पोशाकमा खटिएका छन् । विवादित छविका उनी यसअघि पनि सादा पोशाकमा परिचान भएका थिए । उनकै मिलोमतोमा ठूला तस्करले अवैध रुपमा सामान सजिलै ल्याउन थालेको एक प्रत्यक्षदर्शीले बताए । ‘सोम शर्मा सादा पोशाकमा खटिने वित्तिकै तस्करले लाइन पाएका छन्,’ ति प्रत्यक्षदर्शीले अनलाइन खोजखवरसँग भने ।
सशस्त्र प्रहरी आइजिपी राजु अर्यालले नाकामा कडाई गर्न र कुनै गल्ती फेला परे कारवाही भोग्न तयार रहन निर्देशन दिएका छन् । तर, आइजिपी अर्यालको निर्देशनलाई लत्याउँदै सादा पोशाकमा खटिएका शर्माले सशस्त्र प्रहरी वल ३० नं. गण हेडक्वार्टर वागेश्वरीका गणपति एसपी र सशस्त्र प्रहरी वल लुम्विनीका प्रमुख डिआइजीको नाम भजाएर तस्करसँग रकम असुल्दै आएको स्रोतले जनाएको छ ।
शर्माले आफूलाई डिआइजीले खटाएको भन्दै तस्करलाई त्रास देखाउने, फुर्ती लगाउने र हप्ताका लागि दवाव दिँदै आएको स्वयम् तस्कर बताउँछन् । ‘सोम शर्माका कारण हामी तस्करलाई सामान ल्याउन सहज भएको छ, तर उहाँले हामीलाई आफूले मागेको रकम दिन दवाव दिनुहुन्छ,’ एक तस्करले भने ।
शर्मा यसअघि सादा पोशाकमा खटिदा पनि तस्करसँग मोटो रकम असुलेको आरोप लाग्ने गरेको थियो । तस्करी र तस्करलाई राम्रोसँग चिनेकोले उनलाई सशस्त्र प्रहरीले सादा पोशाकमा खटाउँदै आएको छ, तर उनी तस्करी नियन्त्रण गर्नुभन्दा तस्करलाई मोटाउने काम गर्न थालेका छन् । नाकामा खटिएका सशस्त्र प्रहरीले तस्करको सामान नियन्त्रण प्रयास गर्दा उनै शर्माले फोन गरेर छाड्न दवाव समेत दिँदै आएको उच्च स्रोतले जनाएको छ । ‘शर्मालाई तस्करी हुने ठाउँ र तस्करको नालीबेली थाहा छ । उनले चाहेको खण्डमा एउटा सियो समेत नेपाल भित्रिन पाउँदैन, तर पछिल्लो समय खुलेआम तस्करी भइरहेको छ । बोराका बोरा सामान भित्रिदैछ,’ एक तस्करले भने, ‘नपत्याए नाका र सहायक नाकामा गएर हेर्दा हुन्छ ।’
सशस्त्र प्रहरी बल ३० नं. गण हेडक्वार्टर वागेश्वरीका गणपति एसपी शोभाकान्त खनालले पनि तस्करी नियन्त्रणका लागि कुनै कसुर बाँकी नराख्न मातहतका विओपीलाई निर्देशन दिएका छन् । उनले तस्करसँग मिलेको र पैँसा लिएको प्रमाण फेला पार्ने वित्तिकै कारवाही गर्ने चेतावनी समेत दिँदै आए पनि उनले निर्देशनको बर्खिलाप गरि सादा पोशाकका घुमुवाले मोटो रकम असुलेर एसपी खनालको बदनाम गरिरहेको सशस्त्र प्रहरीका उच्च अधिकृतले गुनासो गरेका छन् । यस विषयमा एसपी खनालले अनुसन्धान तथा जाँचबुझ गरि कारवाहीको दायरामा ल्याउन जरुरी छ ।
नेपाल–भारत सीमा अन्तरगत कुल ६५ किलोमिटर खुला सिमानामा हुने अवैध धन्दा रोक्न सरकारले सशस्त्र प्रहरीलाई खटाएको छ, तर सुरक्षाकर्मी स्वयम अवैध असुली धन्दामा लागेका छन् । भारतसँग खुला सीमाना रहेको बाँकेमा मुख्य नाका बाहेक भित्रि नाकाबाट पनि अवैधरुपमा मालसामान तस्करी हुँदै आएको छ ।
Discussion about this post