बाँके, साउन १२ गते ।
बाँके जिल्ला अदालतले खाद्य स्वच्छता तथा गुणस्तर ऐन उल्लङ्घन गरेको ठहर गर्दै दुई व्यवसायीलाई सजाय गरेको छ। अदालतले एक व्यवसायीलाई एक वर्ष कैद र अर्कालाई रु. ५० हजार जरिवाना गर्ने फैसला सुनाएको हो।
खाद्य प्रविधि तथा गुण नियन्त्रण कार्यालय, नेपालगन्जले दायर गरेका दुई मुद्दामा जिल्ला न्यायाधीश राजु ढुङ्गानाको इजलासले कोहलपुर–११ स्थित अस्मिता चाउमिन उद्योगका सञ्चालक पर्शुराम घिमिरेलाई एक वर्ष कैद सजाय सुनाएको छ। यस्तै, जिल्ला न्यायाधीश इन्दिरा शर्माको इजलासले नेपालगन्ज–२ स्थित गौरी मिनी मार्टका सञ्चालक रामजी वैश्यलाई रु. ५० हजार जरिवाना गर्ने फैसला गरेको कार्यालय प्रमुख प्रशान्त पोखरेलले जानकारी दिए।
कार्यालयका अनुसार गौरी मिनी मार्टबाट बिक्री भइरहेको मासको दालको नमुना परीक्षण गर्दा त्यसमा प्रतिबन्धित बाह्य रङ प्रयोग भएको पुष्टि भएको थियो। अदालतले दुवै मुद्दामा बजार अनुगमन, नमुना सङ्कलन, प्रयोगशाला परीक्षण र अनुसन्धानबाट प्राप्त प्रमाणलाई आधार मानेर फैसला गरेको हो।
यसैबीच, कार्यालयले बर्दियाको गुलरियास्थित आनन्द ड्रिङ्किङ वाटर उद्योगले उत्पादन गरेको प्रशोधित पिउने पानी तथा बाँसगढीस्थित सिजी फुड्स इन्टरप्राइजेज प्रालिले उत्पादन गरेको वाइवाइसहित चार ब्रान्डका तयारी चाउचाउ बजारबाट फिर्ता गर्न सम्बन्धित उद्योगलाई निर्देशन दिएको छ।
गत आर्थिक वर्षमा बाँकेमा ५४० स्थानमा गरिएको बजार अनुगमनका क्रममा कैफियतयुक्त ठहरिएका रु. ६ लाख ३८ हजार ८६४ बराबरका खाद्य तथा दाना पदार्थ नष्ट गरिएको कार्यालयले जनाएको छ।
Discussion about this post