बाँके, साउन १० गते ।
बाँके राष्ट्रिय निकुञ्जमा वन्यजन्तु अवलोकनका लागि पुग्ने पर्यटकको सङ्ख्यामा उल्लेख्य वृद्धि भएको छ। विश्वमै दुर्लभ मानिने पाटेबाघसहित विभिन्न वन्यजन्तु अवलोकन गर्न गत आर्थिक वर्ष २०८२/८३ मा एक हजार ४६६ जना पर्यटक निकुञ्ज पुगेका छन्। यो सङ्ख्या अघिल्लो वर्षको तुलनामा डेढ गुणाभन्दा बढी हो।
निकुञ्जका वरिष्ठ संरक्षण अधिकृत वीरेन्द्रप्रसाद कँडेलका अनुसार आर्थिक वर्ष २०८१/८२ मा ६२० जना पर्यटकले निकुञ्ज भ्रमण गरेका थिए। त्यसभन्दा अघिल्लो आर्थिक वर्ष २०८०/८१ मा भने ४४४ जना मात्रै पर्यटक पुगेका थिए। पछिल्ला दुई वर्षयता पर्यटकको आगमन निरन्तर बढ्नु निकुञ्जको पर्यटन सम्भावनाका लागि सकारात्मक सङ्केत भएको उनले बताए।
उनका अनुसार निकुञ्जको मध्यवर्ती क्षेत्रमा वनभोजलगायतका गतिविधिमा वार्षिक ५० हजारभन्दा बढी आन्तरिक पर्यटक पुग्ने गरे पनि वन्यजन्तुको प्राकृतिक वासस्थान रहेको मुख्य क्षेत्रमा सफारी गर्दै अवलोकन गर्ने पर्यटकको सङ्ख्या पहिलो पटक एक हजार नाघेको हो। अधिकांश पर्यटक मध्यवर्ती क्षेत्रमा सञ्चालित होमस्टे तथा नेपालगन्ज र कोहलपुरका होटलमार्फत सफारीका लागि निकुञ्ज पुगेका थिए।
कँडेलले सफारीका लागि सवारीसाधनको सङ्ख्या बढाउन सके पर्यटकको आगमन अझै वृद्धि हुने बताए। उनका अनुसार पर्यटन पूर्वाधार विस्तार र प्रभावकारी प्रचारप्रसारले बाँके राष्ट्रिय निकुञ्जलाई पश्चिम नेपालको प्रमुख पर्यटकीय गन्तव्यका रूपमा स्थापित गर्न सहयोग पुग्नेछ।
बाँके क्षेत्र नम्बर १ का प्रतिनिधिसभा सदस्य सुरेश चौधरीले निकुञ्जलाई राष्ट्रिय तथा अन्तर्राष्ट्रिय स्तरमा चिनाउन पर्यटन प्रवद्र्धनका कार्यक्रम बढाउनुपर्ने बताए। कोहलपुर नगरपालिकाकी कार्यवाहक नगरप्रमुख सङ्गीता सुवेदीले निकुञ्जको प्रभावकारी ‘ब्रान्डिङ’ आवश्यक रहेको धारणा राखिन्। गाभर भ्याली सामुदायिक होमस्टेका अध्यक्ष कृष्णलाल चौधरी र नेपालगन्ज उद्योग वाणिज्य सङ्घका अध्यक्ष टङ्क धामीले पनि निकुञ्जको व्यापक प्रचारप्रसारमा सम्बन्धित निकायले प्राथमिकता दिनुपर्ने बताएका छन्।
हाल बाँके राष्ट्रिय निकुञ्जमा २५ वटा वयस्क पाटेबाघ रहेका छन्। निकुञ्जमा चितुवासहित अन्य वन्यजन्तुको सङ्ख्या पनि बढ्दो क्रममा छ। यहाँ ३४ प्रजातिका स्तनधारी, २७६ प्रजातिका चरा, २४ प्रजातिका सरिसृप, नौ प्रजातिका उभयचर र ५५ प्रजातिका माछा गरी कुल ४२२ प्रजातिका वन्यजन्तु पाइन्छन्।
वि.सं. २०६७ असार २८ गते स्थापना भएको बाँके राष्ट्रिय निकुञ्ज नेपालगन्ज विमानस्थलबाट करिब १६ किलोमिटर दूरीमा अवस्थित छ। पूर्व–पश्चिम राजमार्गसँग जोडिएको निकुञ्ज स्थल र हवाई दुवै मार्गबाट सहज पहुँचमा रहेकाले पछिल्ला वर्षहरूमा पर्यटकको रोजाइमा पर्न थालेको छ।
Discussion about this post