बाँके, साउन १२ गते ।
बाँके प्रहरीले संगठित रूपमा मोटरसाइकल चोरीमा संलग्न रहेको आरोपमा पाँच जनालाई पक्राउ गरेको छ। उनीहरूको साथबाट चोरी भएका दुई वटा मोटरसाइकल बरामद भएको प्रहरीले जनाएको छ।
जिल्ला प्रहरी कार्यालय बाँकेका अनुसार साउन ९ गते नेपालगन्ज उपमहानगरपालिका–१० स्थित रेष्ट्रोकप क्याफे अगाडि पार्किङ गरी राखिएको भे ११ प ६८२७ नम्बरको होन्डा साइन मोटरसाइकल चोरी भएको सूचनापछि अनुसन्धान सुरु गरिएको थियो। सोही दिन साँझ नम्बर प्लेट परिवर्तन गरी उक्त मोटरसाइकल चलाइरहेका इन्द्रप्रसाद थारु र सन्जु रेश्मी मगरलाई नियन्त्रणमा लिएपछि अनुसन्धान अघि बढाइएको प्रहरीले जनाएको छ।
अनुसन्धानका क्रममा डुडुवा गाउँपालिका–४ निवासी २२ वर्षीय समिर बागवानले मोटरसाइकल चोरी गरेको खुलेको प्रहरीको दाबी छ। चोरीपछि उनले नेपालगन्ज–१८ स्थित जे.के. स्टिकर हाउसमा लगेर मोटरसाइकलको नम्बर प्लेट परिवर्तन गराएको अनुसन्धानबाट खुलेको प्रहरीको भनाइ छ। सोही आरोपमा स्टिकर हाउसका सञ्चालक जाकिर हुसेन कवडियालाई पनि पक्राउ गरिएको छ।
प्रहरीका अनुसार सिसिटिभी फुटेज तथा अन्य प्राविधिक प्रमाणको विश्लेषणबाट बागवान अन्य मोटरसाइकल चोरीका घटनामा पनि संलग्न रहेको देखिएको छ। थप अनुसन्धानका क्रममा उनले चोरी गरी बिक्री गरेको भे ७ प ७७६८ नम्बरको सुपर स्प्लेन्डर मोटरसाइकल खरिदकर्तासहित बरामद गरिएको प्रहरीले जनाएको छ।
घटनामा डुडुवा–३ निवासी सैमुद खाँलाई पनि पक्राउ गरिएको छ। पक्राउ परेकामाथि संगठित रूपमा मोटरसाइकल चोरीसम्बन्धी कसुरमा अनुसन्धान भइरहेको जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतित सिंह राठौरले बताए।
प्रहरीले बरामद गरेका मोटरसाइकलमध्ये एउटा भे ११ प ६८२७ नम्बरको होन्डा साइन र अर्को भे ७ प ७७६८ नम्बरको सुपर स्प्लेन्डर रहेको छ।
Discussion about this post