बाँके फागुन १८ गते ।
चुनाव नजिकिँदै जाँदा बाँके निर्वाचन क्षेत्र नं. २ मा चुनावी माहोल तातेको छ । मौन अवधि सुरु हुनुअघि जनता समाजवादी पार्टी नेपाल का तर्फबाट प्रतिनिधि सभा सदस्य पदका उम्मेदवार कमरुद्दिन राई मतदातामाझ पुग्दै आफ्नो मताधिकार प्रयोग गर्न आग्रह गरिरहेका छन् ।
चुनावी अभियानका क्रममा राई यतिबेला घामपानी, धुलो–धुवाँ र दिनरात नभनी मतदाताको घरदैलोमा पुगेर आफ्ना एजेन्डा सुनाइरहेका छन् । ग्रामीण भेगदेखि शहरी टोलसम्म उनको सक्रियताले चुनावी माहोल थप चलायमान बनेको छ । उनले जनतासँग भेटघाट गर्दै स्थानीय समस्या, विकासका सम्भावना र आफ्नो प्राथमिकता स्पष्ट पार्दै आएका छन् ।
उनका समर्थकहरूका अनुसार राई चुनावका बेला मात्र नभई नियमित रूपमा पनि जनतासँग जोडिने नेताका रूपमा परिचित छन् । “उहाँ जनताको बीचमा बस्न रुचाउने नेता हुनुहुन्छ,” एक स्थानीय समर्थकले बताए।
राजनीतिमा प्रवेश गर्नुअघि राई एक समाजसेवीका रूपमा परिचित थिए । बाँके जिल्लाका विभिन्न क्षेत्रमा उनले शिक्षा, स्वास्थ्य र सामाजिक न्यायका विषयमा सक्रिय भूमिका खेलेको उल्लेख गरिन्छ । उनी यसअघि नेपालगन्ज उपमहानगरपालिका का नगर उपप्रमुखसमेत रहेका थिए । उपप्रमुखको कार्यकालमा पनि उनले सेवामुखी कार्यशैलीलाई निरन्तरता दिएको उनका निकटवर्तीहरू बताउँछन् ।
राईको चुनावी घोषणापत्र समावेशी विकास, सामाजिक न्याय र स्थानीय पूर्वाधार सुदृढीकरणमा केन्द्रित रहेको छ । उनले कृषि, शिक्षा, स्वास्थ्य तथा रोजगारीका क्षेत्रलाई प्राथमिकतामा राख्दै बाँकेलाई समृद्ध र आत्मनिर्भर बनाउने लक्ष्य अघि सारेका छन् । “बाँकेका हरेक समुदायको समान अधिकार र अवसर सुनिश्चित गर्नु मेरो पहिलो कर्तव्य हो,” उनले बताए। उम्मेदवार राईले निर्वाचनमा ‘छाता’ चुनाव चिन्हमा मतदान गर्न मतदातासमक्ष अपिल गरेका छन्।
Discussion about this post