बाँके फगुन १८ गते ।
बाँकेको राजनीतिमा दशकौँदेखि प्रभाव जमाउँदै आएका पूर्वमन्त्री मोहम्मद इस्तियाक राईले चालेको पछिल्लो कदमले यतिबेला मधेस र मुस्लिम समुदायमा ठूलो आक्रोश र सनसनी पैदा गरेको छ ।
मधेस आन्दोलनको राप र तापबाट राजनीतिक उचाइ हाँसिल गरेका राईले आफ्ना मूल एजेण्डा र समुदायको विश्वासलाई ‘तिलाञ्जली’ दिँदै नेकपा (एमाले) मा प्रवेश गरेपछि उनलाई ‘धोकेबाजको पर्याय’ भएको आरोप लागेको हो ।
बाँके क्षेत्र नम्बर–२ बाट दुई पटकसम्म निर्वाचित भएर पटक–पटक मन्त्री बनेका राईले सधैँ मधेसी र मुस्लिम समुदायको अधिकारका लागि लड्ने कसम खाए । तर, पछिल्लो समय जनता समाजवादी पार्टी (जसपा) लाई चटक्कै छोडेर एमालेको ‘सूर्य’ चिह्न रोजेपछि उनीमाथि आफ्नै समुदायलाई ‘सत्ताको सिँढी’ मात्र बनाएको गम्भीर आरोप लागेको छ ।
बाँके क्षेत्र नम्बर–२ का स्थानीय भन्छन्, “जुन एजेण्डाले उनलाई नेता बनायो, आज त्यही एजेण्डा लत्ताएर उनी एमालेमा विलिन हुनु भनेको मधेस विद्रोह र मुस्लिम समुदायको बलिदानीमाथिको अपमान हो ।’
राईको एमाले प्रवेश र उनले पाएको टिकटलाई लिएर एमालेका पुराना र इमानदार कार्यकर्ताहरूमा तीव्र असन्तुष्टि चुलिएको छ । शक्ति र पैसाको आडमा एमालेका कुशल र सक्षम उम्मेदवारहरूको अवसर खोसेको भन्दै पार्टीभित्रै ‘टुरिष्ट उम्मेदवार’ विरुद्ध आवाज उठ्न थालेको छ ।
नेकपा एमालेभित्र लामो समयदेखि पार्टीका लागि रगत–पसिना बगाएका कार्यकर्ताहरूलाई पाखा लगाएर राईलाई काँध थाप्ने नेतृत्वको निर्णयले एमाले बाँकेमा राजनीतिक संकट निम्त्याएको विश्लेषण गरिएको छ ।
बाँकेको संवेदनशील धार्मिक वातावरणमा राईले सधैँ ‘धार्मिक सद्भाव’ को कार्ड खेल्ने गरेको आरोप समुदायमा लुकेको छैन । हिन्दु र मुस्लिम समुदायबीचको सौहार्दतालाई आफ्नो व्यक्तिगत स्वार्थ र चुनावी लाभका लागि प्रयोग गर्ने गरेको भन्दै दुवै समुदायका मानिसहरू अहिले सचेत हुन थालेका छन् । सत्ता र शक्तिका लागि जस्तोसुकै सम्झौता गर्न तयार हुने राईको प्रवृत्तीले बाँकेको सामाजिक सद्भावमा समेत असर पर्न सक्ने भन्दै स्थानीय बुद्धिजीवीहरूले चिन्ता व्यक्त गरेका छन् ।
राईको एमाले प्रवेशले पार्टीका पुराना र इमानदार कार्यकर्ताहरूमा पनि तीव्र विद्रोह निम्त्याएको छ । शक्ति र पैसाको आडमा उनले एमालेका कुशल र सक्षम उम्मेदवारहरूलाई पाखा लगाएर टिकट हत्याएको चर्चाले नेकपा (एमाले) बाँकेभित्र भुसको आगो झैँ असन्तुष्टि फैलिएको छ । वर्षौँदेखि संगठन निर्माणमा लागेका नेताहरू अहिले ‘हाइज्याक’ भएको महसुस गरिरहेका छन् ।
जुन मधेशी र मुस्लिम मुद्दाको वकालत गर्दै राई सत्ताको शिखरमा पुगे, आज तिनै एजेण्डालाई तिलाञ्जली दिएर उनी नेकपा (एमाले) मा प्रवेश गरेपछि मतदाताहरू स्तब्ध भएका हुन् । जनता समाजवादी पार्टी (जसपा) बाट पटक–पटक राजकीय लाभ लिएका राईले पार्टी र कार्यकर्तालाई संकटका बेला साथ दिनुको साटो सत्ता र शक्तिको लोभमा एमाले रोज्नुलाई ‘अवसरवादको पराकाष्ठा’ भनेकाछन् ।
अझ रोचक कुरा के भने टिकटका लागि नेकपा एमाले प्रवेश गरेका इस्तियाक आफू एमाले प्रवेश नगरेको निर्वाचनका लागि एमालेको चुनाव चिन्ह लिएको भन्दै आफ्नै मतदातालाई ठगिरहेकाछन् । उनी यसो भन्नुमा पनि राजनीतिक स्वार्थ छ । त्यो भनेको जसपा बाँकेभित्र आफ्नो पकड र नेता कार्यकर्ताबाट सहयोग मिलोस् भन्ने ध्ययले एमाले प्रवेश गरेको खुलेर बोल्न पनि सकेका छैनन् ।
मधेसी जनअधिकार फोरमदेखि जसपा हुँदै अहिले एमाले बनेका इस्तियाक जुनसुकै दलमा रहे पनि ‘सत्ता र शक्ति’को वरिपरि रहन सफल छन् । झलनाथ खनाल, केपी ओली र शेरबहादुर देउवा तीनै जनाको मन्त्रिपरिषदमा मन्त्री बन्नुले उनको ‘लचकता’ र ‘बार्गेनिङ पावर’ देखाउँछ । तर, यसपटक परिवेश बदलिएकोछ ।
पटक–पटक मन्त्री बनेर पनि क्षेत्रको विकासभन्दा व्यक्तिगत शक्ति आर्जनमा लागेको आरोप खेपिरहेका राईका लागि आगामी फागुन २१ गते हुने निर्वाचन ‘अग्निपरीक्षा’ सावित हुने देखिन्छ ।
‘मधेसी, मुस्लिम र आफ्नै नयाँ पार्टी’का कार्यकर्ताको विश्वास गुमाएका राईले एमालेको छहारीमा आफ्नो राजनीतिक डुङ्गा कसरी पार लगाउँछन्, त्यो भने हेर्न कुर्नै पर्छ ।
Discussion about this post