बाँके चैत ८ गते ।
बाँके जिल्लाको समग्र सुरक्षा व्यवस्थापन, शान्ति–सुव्यवस्था कायम गर्न तथा विभिन्न सुरक्षा निकायबीच प्रभावकारी समन्वयमा उल्लेखनीय भूमिका निर्वाह गरेको भन्दै प्रमुख जिल्ला अधिकारी दिलकुमार तामाङलाई आईजी एपीएफ कमेन्डेशनबाट सम्मानित गरिएको छ।
२५औँ सशस्त्र प्रहरी दिवस २०८२ का अवसरमा आइतबार आयोजित विशेष समारोहमा सशस्त्र प्रहरी बल नेपालका महानिरीक्षक राजु अर्यालले तामाङलाई उक्त सम्मान प्रदान गरेका हुन्।
सशस्त्र प्रहरी बलका अनुसार बाँकेमा सीमा सुरक्षा, अपराध नियन्त्रण, विपद् व्यवस्थापन तथा सामुदायिक शान्ति कायम गर्न तामाङले सक्रिय नेतृत्वदायी भूमिका खेलेका छन्। विशेषगरी भारतसँग जोडिएको खुला सीमाको संवेदनशीलतालाई ध्यानमा राख्दै सुरक्षा व्यवस्थापनमा उनले देखाएको सक्रियता प्रशंसनीय रहेको उल्लेख गरिएको छ।
सम्मान कार्यक्रममा महानिरीक्षक अर्यालले तामाङसहित सम्मानित व्यक्तित्वहरूलाई बधाई दिँदै राष्ट्रको सुरक्षा र स्थायित्वका लागि यस्ता योगदान प्रेरणादायी हुने विश्वास व्यक्त गरे।
उक्त अवसरमा चर्चित गायक दीपक लिम्बू र पर्वतारोही टासी लाक्पा शेर्पालाई पनि सम्मान गरिएको थियो। कार्यक्रममा सशस्त्र प्रहरी अतिरिक्त महानिरीक्षकहरू नारायणदत्त पौडेल, बंशीराज दाहाललगायत उच्च अधिकारीहरूको उपस्थिति रहेको थियो।
त्यसैगरी, सशस्त्र प्रहरी बल नेपाल नं. ३० गण बागेश्वरी, बाँकेका गणपति सशस्त्र प्रहरी उपरीक्षक भीमबहादुर चन्दले प्रमुख जिल्ला अधिकारी तामाङको समन्वय र निर्देशनमा सीमा सुरक्षालाई थप प्रभावकारी बनाइएको देखिएको छ ।
Discussion about this post