बाँके वैशाख १६ गते ।
बाँकेको सुनर इभेन्ट प्रा.लिको आयोजनामा नेपालगन्जमा राष्ट्रिय स्तरको रात्रिकालीन क्रिकेट प्रतियोगिता आयोजना हुने भएको छ । प्रतियोगिता वैशाख २५ गतेदेखि सुरु हुने आयोजकले नेपालगन्जमा आयोजित पत्रकार सम्मेलनमार्फत जानकारी गराएको हो ।
राति साढे ७ बजेदेखि मध्यराति १२ बजेसम्म सञ्चालन हुने प्रतियोगितामा कम्तीमा ४० टिम सहभागी हुने अपेक्षा गरिएको छ । प्रतियोगितामा सहभागी हुन इच्छुक टिमले वैशाख १६ देखि २३ गतेसम्म नाम दर्ता गराउन सक्नेछन् । प्रत्येक टिमका लागि ११ हजार रुपैयाँ प्रवेश शुल्क निर्धारण गरिएको आयोजकले जनाएको छ ।
सुनर इभेन्ट प्रा.लिका अध्यक्ष नरपतिनाथ योगीका अनुसार प्रतियोगितामा प्रथम हुने टिमलाई १ लाख रुपैयाँ र द्वितीय हुने टिमलाई ५० हजार रुपैयाँ नगद पुरस्कार प्रदान गरिनेछ । ‘म्यान अफ द सिरिज’ लाई एनएस बजारको तर्फबाट मोटरसाइकल पुरस्कार प्रदान गरिनेछ भने ‘म्यान अफ द म्याच’ लाई कृष्टल विद्यालयले ११ हजार रुपैयाँ नगद प्रदान गर्ने घोषणा गरेको छ ।
नेपालगन्ज बसपार्क नजिक, विद्युत प्राधिकरणको परिसर छेउमा रहेको खेल मैदानमा सञ्चालन हुने प्रतियोगिताका लागि करिब ८ लाख रुपैयाँ खर्च हुने अनुमान गरिएको छ । प्रतियोगितामा देशभरका टिमहरू सहभागी हुन पाउनेछन् ।
कार्यक्रममा बोल्दै अध्यक्ष योगीले नेत्रहीन संघमा अध्ययनरत विद्यार्थीहरूको सहयोगार्थ प्रतियोगिता आयोजना गरिएको जानकारी दिए । उनका अनुसार खेलबाट बचत हुने रकम विद्यार्थीहरूको शैक्षिक सुधारमा खर्च गरिनेछ ।
नेत्रहीन संघका सल्लाहकार खेम रानाले श्रवण तथा दृष्टिविहीन बालबालिकाको शिक्षालाई प्राथमिकतामा राख्नुपर्नेमा जोड दिँदै सामाजिक उद्देश्यसहितको यस्तो कार्यक्रमको प्रशंसा गरे । उनले संविधान, शिक्षा नीति तथा अपाङ्गता सम्बन्धी अन्तर्राष्ट्रिय महासन्धिहरूले समेत समावेशी शिक्षालाई प्राथमिकता दिएको उल्लेख गर्दै राज्यले यसतर्फ थप ध्यान दिनुपर्ने बताए ।
राष्ट्रिय खेलकुद परिषद्का वरिष्ठ प्रशिक्षक दिपेन्द्र प्रताप सिंहले टेनिस क्रिकेटभन्दा लेदर बल क्रिकेट बढी उपलब्धिमूलक हुने बताए पनि नेपालगन्जमा हुन लागेको यस रात्रिकालीन प्रतियोगिताले सामाजिक सन्देश प्रवाह गर्ने भएकाले सफल हुने विश्वास व्यक्त गरे ।
पत्रकार सम्मेलनमा सुनर इभेन्टका सञ्चालक प्रेम सिंह, कृष्टल विद्यालयका संस्थापक संजय जप्रेल, मुस्ताक अन्सारीलगायतले पनि आ–आफ्ना धारणा व्यक्त गरेका थिए ।
Discussion about this post