बाँके, जेठ ९ गते ।
बाँकेको राप्ती नदीस्थित सिधनियाघाटमा निर्माणाधीन बहुप्रतिक्षित वैकुण्ठधामको मुख्य संरचना निर्माण कार्य केही समयका लागि स्थगित गरिएको छ ।
सघन शहरी तथा भवन निर्माण आयोजना कार्यालय, नेपालगन्जमा बसेको सरोकारवाला निकायहरूको संयुक्त बैठकले हालको प्राविधिक अवस्था, नदीको बहाव तथा वर्षायाम नजिकिँदै गएको परिस्थितिलाई ध्यानमा राख्दै निर्माण कार्य तत्काल अघि बढाउन उपयुक्त नभएको निष्कर्ष निकालेपछि काम रोक्ने निर्णय गरिएको वैकुण्ठधाम समितिले जनाएको छ ।
वैकुण्ठधाम समितिका अध्यक्ष डा. सुरेशकुमार कनोडियाका अनुसार राप्ती नदीमाथि निर्माणाधीन पुलको बाँकी काम, नदी डाइभर्सन प्रक्रिया तथा तीव्र बहावका कारण निर्माण कार्य अस्थायी रूपमा स्थगित गरिएको हो ।
उनले बैठकमा पुल निर्माणको प्रगति, नदी नियन्त्रण, संरचनागत अवस्था, नदी बहाव, वर्षायामको सम्भावित प्रभाव तथा आगामी कार्ययोजनाबारे विस्तृत समीक्षा गरिएको जानकारी दिए ।
बैठकमा सहभागी सरोकारवालाहरूले वैकुण्ठधाम निर्माण कार्यलाई राप्ती नदीमाथि निर्माणाधीन करिब ७०० मिटर लामो पुल परियोजनासँग समन्वय गरेर अघि बढाइरहेको बताएका छन् । पुल निर्माणसँगै गरिने नदी नियन्त्रण तथा डाइभर्सन कार्यसँग सहकार्य गर्दै घाट निर्माण गर्ने रणनीति अपनाइएको उनीहरूको भनाइ छ ।
हाल पुलको पश्चिमतर्फ रहेका दुई स्पानको ढलान कार्य बाँकी रहेको छ । साथै वर्षायाम नजिकिँदै जाँदा नदीको गहिरो बहाव क्षेत्रमा पियर–१० को क्याप निर्माण भइरहेकाले थप जोखिम देखिएको जनाइएको छ ।
बैठकले आगामी आर्थिक वर्ष २०८३/८४ को माघभित्र बाँकी दुई स्पानको ढलान सम्पन्न गर्ने लक्ष्य तय गरेको छ । त्यसपछि हिउँदमा नदी डाइभर्सन गरी वैकुण्ठधामको जग निर्माण कार्य अघि बढाइने निर्णय गरिएको अध्यक्ष डा. कनोडियाले बताए ।
उनले परियोजनामा आएको ढिलाइ “काबुबाहिरको परिस्थिति” का कारण भएको उल्लेख गर्दै बाँकेवासी, सहयोगदाता तथा शुभेच्छुकहरूलाई धैर्यता अपनाइदिन आग्रह गरेका छन् ।
समितिका अनुसार वैकुण्ठधाम निर्माणका लागि आर्थिक वर्ष २०८१/८२ मा दुई करोड रुपैयाँ बजेट विनियोजन गरिएको थियो । सोहीअनुसार सघन शहरी तथा भवन निर्माण आयोजना कार्यालय, बाँकेले न्यू नेशनल बिल्डर्स, भीमेश्वर–१०, दोलखासँग एक करोड ६५ लाख ९० हजार ५४२ रुपैयाँमा ठेक्का सम्झौता गरेको थियो ।
निर्माण सम्झौता आर्थिक वर्षको अन्तिम समयमा भएकाले निर्धारित अवधिमा काम सम्पन्न हुन नसक्ने देखिएपछि आयोजनाको म्याद आर्थिक वर्ष २०८२/८३ सम्म थप गरिएको थियो । चालु आर्थिक वर्षमा थप तीन करोड रुपैयाँ बजेट विनियोजन भए पनि अघिल्लो ठेक्काअन्तर्गतको काम पूरा नभएकाले नयाँ प्रक्रिया अघि बढ्न सकेको छैन ।
Discussion about this post