बाँके, जेठ २९ गते ।
नेपालगन्जस्थित पश्चिम नेपालको प्रमुख सरकारी स्वास्थ्य संस्था भेरी अस्पतालमा विगतदेखि बन्द रहेका विभिन्न सेवाहरू पुनः सञ्चालनमा ल्याउने, आवश्यक जनशक्ति व्यवस्थापन गर्ने, आधुनिक उपकरण थप्ने तथा पूर्वाधार सुदृढीकरण गर्ने कार्यलाई विशेष प्राथमिकताका साथ अघि बढाइएको अस्पताल प्रशासनले जनाएको छ।
भेरी अस्पतालका प्रमुख मेडिकल सुपरिन्टेन्डेन्ट (मेसु) डा. नवीन दर्नालका अनुसार अस्पताललाई क्षेत्रीयस्तरको सुविधासम्पन्न स्वास्थ्य संस्थाका रूपमा विकास गर्ने उद्देश्यसहित सेवा विस्तार तथा गुणस्तर अभिवृद्धिका योजनाहरू कार्यान्वयन भइरहेको छ। विगतमा विभिन्न कारणले बन्द भएका सेवाहरू पुनः सञ्चालनमा ल्याउनुका साथै नयाँ सेवा थप्ने तयारी समेत भइरहेको उनले बताए।
उनका अनुसार सेवा विस्तार, दक्ष जनशक्ति व्यवस्थापन, अत्याधुनिक उपकरणको व्यवस्था तथा पूर्वाधार विकासमार्फत भेरी अस्पताललाई पश्चिम नेपालकै अग्रणी र सुविधासम्पन्न अस्पतालका रूपमा स्थापित गर्ने लक्ष्य राखिएको छ।
डा. दर्नालले लामो समयदेखि बन्द रहेको सिटी स्क्यान सेवा चालु आर्थिक वर्षभित्र पुनः सञ्चालनमा ल्याउने तयारी भइरहेको जानकारी दिए। उनले पुरानो उपकरण भएकाले मर्मतमा अपेक्षाकृत बढी खर्च लाग्ने तथा मर्मतपश्चात् पनि पुनः प्राविधिक समस्या आउन सक्ने सम्भावना रहेकाले मितव्ययितालाई ध्यानमा राख्दै आवश्यक प्रक्रिया अघि बढाइएको बताए।
उनले स्वास्थ्य तथा जनसंख्या मन्त्री र स्वास्थ्य सचिवसँग भेट गरी अस्पतालका लागि आवश्यक उपकरण, जनशक्ति तथा पूर्वाधार व्यवस्थापनका विषयमा ध्यानाकर्षण गराइएको जानकारी दिए। सेवा विस्तारका लागि आवश्यक स्रोतसाधन उपलब्ध गराइदिन मन्त्रालयसमक्ष औपचारिक आग्रह समेत गरिएको उनले बताए।
अस्पताल प्रशासनका अनुसार संघीय स्वास्थ्य तथा जनसंख्या मन्त्रालयसँग आवश्यक जनशक्ति र स्रोतसाधन उपलब्ध गराउन माग गरिएको छ। छात्रवृत्ति करारअन्तर्गत कार्यरत चिकित्सकहरूको करार अवधि समाप्त भएका विभागहरूमा नयाँ चिकित्सक नियुक्तिका लागि पनि अनुरोध गरिएको छ।
त्यसैगरी मानसिक रोग, नेत्ररोग, प्रसूति तथा स्त्रीरोगलगायत विभिन्न विभागमा विशेषज्ञ चिकित्सकको अभाव रहेको जनाउँदै मन्त्रालयमा आवश्यक जनशक्ति माग गरिएको भेरी अस्पताल विकास समितिले जनाएको छ।
विकास समितिका सदस्य डा. डक्टप्रसाद धितालका अनुसार विशेषज्ञ चिकित्सकसँगै एमबीबीएस चिकित्सकहरूको पनि थप आवश्यकता रहेको छ। अस्पतालको सेवा प्रवाहलाई प्रभावकारी बनाउन सोहीअनुसार जनशक्ति व्यवस्थापनका लागि सम्बन्धित निकायसँग पहल गरिएको उनले बताए।
Discussion about this post