बाँके, असार २३ गते ।
नेत्र ज्योति संघ फत्तेबाल आँखा अस्पताल, फुल्टेक्रा–बाँकेले चालु आर्थिक वर्ष २०८२/०८३ को पहिलो ११ महिनामा ९८ हजारभन्दा बढी सेवाग्राहीलाई बहिरङ्ग (ओपीडी) सेवा प्रदान गरेको छ। सोही अवधिमा ९ हजारभन्दा बढी बिरामीको सफल शल्यक्रिया गरिएको अस्पतालले जनाएको छ।
अस्पतालका प्रबन्ध निर्देशक डा. कौशल वर्माका अनुसार साउनदेखि जेठ मसान्तसम्म ९८ हजार ३९६ जनाले ओपीडी सेवा लिएका छन् भने ९ हजार ७८ जनाले विभिन्न प्रकारका आँखा सम्बन्धी शल्यक्रिया गराएका छन्।
शल्यक्रिया गराउनेमध्ये ६ हजार ८९० जनाको मोतिबिन्दु, १ हजार ९ जनाको कर्निया, ४८२ जनाको रेटिना तथा ६ सयभन्दा बढी बिरामीको जलविन्दुसहित अन्य साना (माइनर) शल्यक्रिया गरिएको उनले जानकारी दिए।
अस्पतालले शल्यक्रिया सेवालाई अझ गुणस्तरीय र व्यवस्थित बनाउन पाँचवटा मोडुलर अपरेशन थिएटर निर्माण सम्पन्न गरेको छ। आवश्यक उपकरण तथा फर्निचर व्यवस्थापनपछि ती सञ्चालनमा ल्याइने तयारी भइरहेको डा. वर्माले बताए।
हाल दुईवटा शल्यक्रिया कक्षबाट सेवा सञ्चालन भइरहेको अस्पतालमा नयाँ मोडुलर कक्ष सञ्चालनमा आएपछि मोतिबिन्दु, रेटिना, कर्निया र अकुलोप्लास्टीलगायतका शल्यक्रिया छुट्टाछुट्टै कक्षबाट सञ्चालन गरिनेछ। यसबाट सेवा थप प्रभावकारी र स्तरीय बन्ने अपेक्षा गरिएको छ।
गत आर्थिक वर्ष २०८१/०८२ मा अस्पताल तथा यसका सेवा केन्द्रमार्फत एक लाख ३७ हजारभन्दा बढीले आँखा परीक्षण गराएका थिए। तीमध्ये एक लाख ५ हजार ७९३ जनाले अस्पतालबाट, १० हजार ४९२ जनाले सामुदायिक आँखा उपचार केन्द्रबाट र २१ हजार ४४६ जनाले बाह्य शिविरमार्फत सेवा लिएका थिए। सो अवधिमा ९ हजार ७८८ जनाको शल्यक्रिया गरिएको थियो।
फत्तेबाल आँखा अस्पतालले लुम्बिनी, कर्णाली र सुदूरपश्चिम प्रदेशका सेवाग्राहीसँगै भारतका सीमावर्ती क्षेत्रका नागरिकलाई समेत सेवा प्रदान गर्दै आएको छ। अस्पतालमा रेटिना तथा अकुलोप्लास्टीसहितका विशिष्टीकृत आँखा उपचार सेवा नियमित रूपमा सञ्चालन भइरहेको डा. वर्माले बताए।
हाल अस्पतालबाट आँखासम्बन्धी सबै प्रकारका रोगको परीक्षण तथा औषधोपचार, जलविन्दुको शल्यक्रिया, न्यून दृष्टि परामर्श, याग लेजर सेवा, टाँकाविहीन तथा फेको प्रविधिबाट मोतिबिन्दुको शल्यक्रिया, डेढो आँखाको शल्यक्रिया, इन्ट्रोपियन र प्टेरिजियमको उपचार, आँसु नलीको शल्यक्रिया, रेटिना शल्यक्रिया, एभास्टिन इन्जेक्सन तथा रेटिना र अकुलोप्लास्टिकसम्बन्धी विशिष्टीकृत सेवा उपलब्ध गराइँदै आएको अस्पतालले जनाएको छ।
Discussion about this post