बाँके, असार २३ गते ।
हुलाकी राजमार्गअन्तर्गत बाँकेको डुडुवा र राप्तीसोनारी गाउँपालिकालाई जोड्ने राप्ती नदीस्थित सिधनियाघाटमा निर्माणाधीन नयाँ पक्की पुलको मुख्य संरचना अन्तिम चरणमा पुगेको छ। पुलका ११ वटै पिल्लर निर्माण सम्पन्न भइसकेका छन् भने १० मध्ये आठ वटा स्पान जडान भइसकेका छन्।
हुलाकी राजमार्ग निर्देशनालय योजना कार्यालय, नेपालगन्जका प्रमुख लिलाबहादुर भण्डारीका अनुसार बाँकी दुई वटा स्पानको निर्माण पनि तीव्र गतिमा भइरहेको छ। उनका अनुसार पिल्लर निर्माण सकिएकाले अब पुल निर्माणमा ठूलो प्राविधिक अवरोध आउने सम्भावना छैन।
हाल सिधनियाघाटमा रहेको साँघुरो पुलका कारण सवारीसाधनले पालो कुरेर आवतजावत गर्नुपर्ने अवस्था छ। बढ्दो सवारी चापलाई मध्यनजर गर्दै ११ मिटर चौडाइको नयाँ पुल निर्माण सुरु गरिएको हो।
करिब डेढ दशकअघि निर्माण भएको ३५० मिटर लामो पुरानो पुलको क्षमताले अहिलेको सवारी चाप धान्न नसकेपछि नयाँ पुल निर्माणको योजना अघि बढाइएको हो।
पुल निर्माणका लागि २०७९ माघ १० गते लुम्बिनी–रौताह–बन्धन भगवती जेभी, काठमाडौंसँग ५३ महिनाभित्र काम सम्पन्न गर्ने गरी सम्झौता गरिएको थियो। आयोजनाको लागत भ्याटसहित एक अर्ब १९ करोड रुपैयाँ रहेको छ।
यस आयोजनाअन्तर्गत ७०० मिटर लामो नयाँ पुल, एक हजार ४८० मिटर एप्रोच सडक, चार किलोमिटर नदी नियन्त्रण संरचना तथा ३०० मिटर सडक ढलान निर्माण गरिनेछ। नयाँ पुल हाल सञ्चालनमा रहेको पुलको छेउमै निर्माण भइरहेको हो।
Discussion about this post