बाँके, साउन ३ गते ।
काठमाडौंको टेकुमा लागुऔषध कारोबारीलाई नियन्त्रणमा लिने क्रममा प्रहरीले गोली चलाउँदा एक भारतीय नागरिक घाइते भएका छन्। घटनामा घाइतेसहित तीन जनालाई पक्राउ गरिएको छ भने उनीहरूको साथबाट ठूलो परिमाणमा नशालु औषधि बरामद भएको प्रहरीले जनाएको छ।
प्रहरीको लागुऔषध नियन्त्रण ब्यूरोका अनुसार आइतबार दिउँसो काठमाडौं महानगरपालिका–१२ स्थित टेकु दोभान पुल नजिक कारबाहीका क्रममा भारत उत्तर प्रदेशको रुपैडिहा निवासी २५ वर्षीय राज सोनी प्रहरीको गोली लागेर घाइते भएका हुन्। उनको दायाँ खुट्टाको घुँडामाथि र घुँडामुनि गरी दुई राउन्ड गोली लागेको छ। उनको राष्ट्रिय ट्रमा सेन्टरमा उपचार भइरहेको छ।
उक्त घटनामा बाँकेको नेपालगन्ज–परसपुर निवासी १९ वर्षीय निखिल सोनी र सुर्खेतको पञ्चपुरी नगरपालिका–५, बाबियाचौरकी १९ वर्षीया शोफिया मगरलाई पनि प्रहरीले पक्राउ गरेको छ। प्रारम्भिक अनुसन्धानअनुसार उनीहरू राज सोनीका सहयोगी रहेको खुलेको छ।
प्रहरीले पक्राउ परेकाहरूको साथबाट २४ हजार ७ सय क्याप्सुल टपेन्डाडोल बरामद गरेको जनाएको छ। ब्यूरोका प्रमुख एसएसपी सुवास बोहराका अनुसार राज सोनी भारतबाट काठमाडौं उपत्यकामा लागुऔषध भित्र्याउने सक्रिय तथा मुख्य कारोबारीमध्ये एक रहेको प्रारम्भिक अनुसन्धानबाट खुलेको छ।
प्रहरीका अनुसार विशेष सूचनाका आधारमा खटिएको टोलीले उनीहरूलाई नियन्त्रणमा लिन खोज्दा कारोबारीहरूले प्रहरीमाथि आक्रमण गर्दै भाग्ने प्रयास गरेका थिए। त्यसपछि प्रहरीले पहिलो चरणमा हवाई फायर गरी आत्मसमर्पण गर्न चेतावनी दिएको थियो।
“हवाई फायर गर्दा पनि नरोकेपछि थप बल प्रयोग गर्नुपर्ने अवस्था सिर्जना भयो,“ एसएसपी बोहराले भने।
त्यसपछि प्रहरीले राज सोनीको दायाँ खुट्टामा दुई राउन्ड गोली प्रहार गरी नियन्त्रणमा लिएको जनाएको छ।
घटनापछि पक्राउ परेका तीनै जनामाथि लागुऔषध कारोबारसम्बन्धी कसुरमा थप अनुसन्धान भइरहेको प्रहरीले जनाएको छ।
Discussion about this post