बाँके, साउन ११ गते ।
डिभिजन वन कार्यालय बाँकेले नवरोपित बिरुवाको संरक्षणका लागि गत आर्थिक वर्ष २०८२/८३ मा २० किलोमिटरभन्दा बढी क्षेत्रमा तारजाली घेराबार गरेको छ। सामुदायिक तथा सरकारी व्यवस्थापनमा रहेका वनका १९ स्थानमा गरिएको घेराबारसँगै २३९.१९ हेक्टर क्षेत्रफलमा वृक्षारोपण तथा वन पुनरुत्पादन प्रवद्र्धनका कार्यक्रम सञ्चालन गरिएका छन्।
डिभिजन वन कार्यालयका प्रमुख सिनियर डिभिजनल वन अधिकृत शङ्कर गुप्ताका अनुसार केही क्षेत्रमा नयाँ बिरुवा रोपिएको छ भने अधिकांश स्थानमा प्राकृतिक पुनरुत्पादनलाई प्रोत्साहन गरिएको छ। नरैनापुर, विन्ध्यवासिनी, मितेरी, कन्याश्वरी, ज्योतिलगायतका सामुदायिक वन, सरकारद्वारा व्यवस्थित शमशेरगन्ज र भुवरभवानी चक्ला वन तथा खजुरा गाउँपालिकास्थित सार्वजनिक जग्गामा समेत तारजाली घेराबार गरिएको उनले बताए।
उनका अनुसार बिरुवा रोपेर मात्र वन संरक्षण सम्भव नहुने भएकाले संरक्षणलाई प्राथमिकतामा राख्दै घेराबार गरिएको हो। यसबाट बिरुवाको बाँच्ने दर वृद्धि हुनुका साथै वन पुनःस्थापना, हरियाली विस्तार र जैविक विविधता संरक्षणमा दीर्घकालीन टेवा पुग्ने अपेक्षा गरिएको छ।
Discussion about this post