बाँके, साउन १८ गते ।
बाँकेको नेपालगन्जबाट प्रहरीले ५२६ ग्राम २९० मिलिग्राम ब्राउन सुगरजस्तो देखिने लागूऔषधसहित दुई जनालाई पक्राउ गरेको छ।
जिल्ला प्रहरी कार्यालय बाँकेका अनुसार नेपालगन्ज उपमहानगरपालिका–४ न्युरोडस्थित रणबहादुर केसीको घरमा लागूऔषधको कारोबार भइरहेको भन्ने विशेष सूचनाका आधारमा लागूऔषध नियन्त्रण ब्युरो शाखा कार्यालय नेपालगन्ज र वडा प्रहरी कार्यालय नेपालगन्जबाट खटिएको प्रहरी टोलीले उनीहरूलाई पक्राउ गरेको हो।
पक्राउ पर्नेमा नेपालगन्ज उपमहानगरपालिका–४ का ३० वर्षीय सुशिल भण्डारी र वडा नम्बर १० का ५५ वर्षीय अरुणकुमार जयसवाल छन्।
प्रहरी टोलीले दुवै जनाको खानतलासी गर्दा उनीहरूको साथबाट १३६ ग्राम ८५० मिलिग्राम लागूऔषध फेला पारेको थियो। त्यसपछि अनुसन्धानका क्रममा जयसवालको घरमा समेत खानतलासी गर्दा कोठामा रहेको दराजभित्रबाट थप ३८९ ग्राम ४४० मिलिग्राम लागूऔषध बरामद भएको प्रहरीले जनाएको छ।
प्रहरीका अनुसार बरामद लागूऔषधको कुल शुद्ध तौल ५२६ ग्राम २९० मिलिग्राम छ।
उनीहरूको साथबाट डिजिटल तराजु एक थान, भारतीय रुपैयाँ २ लाख १ हजार ४ सय, नेपाली रुपैयाँ १ लाख ८० हजार र विभिन्न कम्पनीका दुई थान मोबाइल फोनसमेत बरामद भएको छ।
बरामद भारतीय र नेपाली नगदको कुल नेपाली मूल्य ५ लाख २ हजार २४० रुपैयाँ रहेको प्रहरीले जनाएको छ।
पक्राउ परेका दुवै जनामाथि लागूऔषधसम्बन्धी कसुरमा आवश्यक अनुसन्धान भइरहेको जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतीतसिंह राठौरले जानकारी दिए।
Discussion about this post