कपिलवस्तु, साउन २४ गते ।
कपिलवस्तुको विजयनगरमा पेस्तोल बोकेर स्थानीयलाई डर, धम्की दिएको आरोपमा तीन जना पक्राउ परेका छन् । प्रहरीले उनीहरूलाई विजयनगर गाउँपालिका–४, जगदीशपुरबाट पक्राउ गरेको हो ।
पक्राउ पर्नेमा कृष्णनगर नगरपालिका–५, डबराका २३ वर्षीय आशिष पाण्डे, कृष्णनगर–८, दयानगरका २१ वर्षीय जितेन्द्र मौरिया र सोही ठाउँका १९ वर्षीय विनोद कश्यप छन् ।
जिल्ला प्रहरी कार्यालय कपिलवस्तुका अनुसार उनीहरू पेस्तोल बोकेर बहादुरगञ्ज क्षेत्रका स्थानीयलाई डर, धम्की दिँदै हिँडिरहेको सूचना प्राप्त भएको थियो । सूचनाका आधारमा खोजी गर्ने क्रममा उनीहरूलाई पक्राउ गरिएको हो ।
प्रहरीले उनीहरूको साथबाट एक थान पेस्तोल र लु ६१ प ७०७२ नम्बरको मोटरसाइकल बरामद गरेको जनाएको छ ।
घटनाबारे थप अनुसन्धान भइरहेको जिल्ला प्रहरी कार्यालय कपिलवस्तुले जनाएको छ ।
ADVERTISEMENT
Discussion about this post