बाँके, साउन ३० गते ।
राप्ती नदीमा बगेकी नरैनापुर गाउँपालिका–६ चौबिसबिघाकी एक महिलालाई प्रहरीले सकुशल उद्धार गरेको छ।
इलाका प्रहरी कार्यालय भगवानपुरका प्रहरी निरीक्षक सुरेश कोइरालाका अनुसार शनिबार दिउँसो शेषरानी यादव राप्ती नदीमा बगेको सूचना प्रहरीलाई प्राप्त भएको थियो। सूचना पाएलगत्तै प्रहरी र सशस्त्र प्रहरीको टोली घटनास्थल पुगेको थियो।
इलाका प्रहरी कार्यालय भगवानपुर र सशस्त्र प्रहरी बल, बीओपी गंगापुरबाट खटिएको संयुक्त टोलीले नदीमा पसेर यादवको उद्धार गरेको कोइरालाले बताए। उद्धारमा स्थानीय बासिन्दाले समेत सहयोग गरेका थिए।
उद्धार गरिएकी यादवको उपचार भइरहेको प्रहरीले जनाएको छ।
वर्षायाममा राप्ती नदीसहित स्थानीय खोला तथा नदीमा पानीको बहाव बढ्ने भएकाले जोखिमयुक्त क्षेत्रमा नजान प्रहरीले आग्रह गरेको छ। जिल्ला प्रहरी कार्यालय बाँकेले नदी तथा खोलाको किनारमा बस्ने सर्वसाधारणलाई सतर्कता अपनाउन आग्रह गर्दै आएको जनाएको छ।
Discussion about this post