बाँके, भदौ १५ गते ।
नेपालगन्ज रोड–नानपारा–बहराइच रेलखण्डको भारतको रुपइडिहामा औपचारिक उद्घाटन गरिएको छ। उत्तर प्रदेशका मुख्यमन्त्री योगी आदित्यनाथ र भारतका केन्द्रीय रेलमन्त्री अश्विनी वैष्णवले संयुक्त रूपमा रेलखण्डको उद्घाटन गरेका हुन्।
उद्घाटनसँगै सोमबार रुपइडिहाबाट वाराणसीका लागि पहिलो रेल सञ्चालन गरिएको थियो।
उद्घाटन कार्यक्रममा मुख्यमन्त्री योगी आदित्यनाथले नेपालगन्ज रोडसम्म रेल सेवा सञ्चालन भएपछि नेपाल–भारतबीचको आर्थिक गतिविधि बढ्नुका साथै पर्यटन प्रवद्र्धनमा समेत सहयोग पुग्ने बताए।
उनले रेल सेवाले नेपाल र भारतबीचको सांस्कृतिक सम्बन्धलाई थप मजबुत बनाउने दाबी गरे। धार्मिक पर्यटनका दृष्टिले पनि रेल सेवा महत्वपूर्ण हुने उनको भनाइ थियो।
‘नेपाल–भारतको सांस्कृतिक सम्बन्ध सुधारमा थप बल पुग्नेछ। यो रेल सेवाले नेपाल–भारतका धार्मिक स्थललाई जोड्नेछ,’ उनले भने।
मुख्यमन्त्री योगीले आगामी दिनमा रेल सेवालाई थप विस्तार गर्दै लैजाने बताए। नेपालमा पछिल्लो समय आएको बाढीपहिरोले ठूलो क्षति पु¥याएको प्रसंग उल्लेख गर्दै उनले विपद्का बेला छिमेकीका रूपमा भारतले नेपाललाई सहयोग गर्ने बताए।
‘छिमेकी भएको नाताले भारतले नेपाललाई सहयोग गर्ने दायित्व रहन्छ। म नेपालमा भएको विनाशकारी बाढीबाट भएको क्षतिप्रति दुःख व्यक्त गर्दछु। मृतकप्रति श्रद्धाञ्जली र शोकाकुल परिवारजनमा समवेदना व्यक्त गर्दछु,’ उनले भने।
नेपाललाई असल छिमेकीका रूपमा लिएको उल्लेख गर्दै योगीले नेपालका सुख–दुःखमा भारत साथमा रहने प्रतिबद्धता जनाए।
कार्यक्रममा केन्द्रीय रेलमन्त्री अश्विनी वैष्णवले नेपालसँगको सम्बन्धलाई थप मजबुत बनाउन भारतले आफ्नो रेल सेवा नेपाल–भारत सीमासम्म विस्तार गरेको बताए।
उनले सीमासम्म रेल सेवा विस्तार गर्नु भारत सरकारको नीतिअनुसार भएको स्पष्ट पारे। नेपाल–भारतबीचको व्यापार, आवागमन, धार्मिक पर्यटन तथा जनस्तरको सम्बन्ध विस्तारमा रेल सेवाले महत्वपूर्ण भूमिका खेल्ने उनको भनाइ थियो।
Discussion about this post