बाँके, भदौ १५ गते ।
यस वर्ष बाँकेमा ८ हजार ५ सय घरपरिवारका करिब ३५ हजार जनसंख्या बाढी तथा डुबानको जोखिममा रहेको पूर्वानुमान गरिएको छ।
जिल्ला विपद् व्यवस्थापन समिति बाँकेले तयार पारेको मनसुन पूर्वतयारी कार्ययोजनाले जिल्लामा उक्त संख्याको जनसंख्या बाढी तथा डुबानबाट प्रभावित हुनसक्ने आकलन गरेको हो।
सम्भावित बाढी तथा डुबानबाट हुने क्षति न्यूनीकरणका लागि आवश्यक पूर्वतयारी गरिएको जिल्ला विपद् व्यवस्थापन समितिका सूचना व्यवस्थापन अधिकृत रूपन ज्ञवालीले बताए।
उनका अनुसार पहाडी जिल्लामा भइरहेको वर्षाका कारण नदी तथा खोलामा पानीको बहाव बढ्न सक्ने भएकाले बाँकेका जोखिमयुक्त क्षेत्रमा उच्च सतर्कता अपनाइएको छ। सम्भावित बाढी तथा डुबानको जोखिम रहेका स्थानमा आवश्यक तयारी अवस्थामा रहन सम्बन्धित निकायलाई आग्रह गरिएको उनले बताए।
बाँकेका प्रमुख जिल्ला अधिकारी दिलकुमार तामाङले सम्भावित बाढी तथा डुबानबाट हुने क्षति न्यूनीकरणका लागि जिल्ला विपद् व्यवस्थापन समिति र जिल्लाका आठवटै स्थानीय तहले मनसुन पूर्वतयारी तथा प्रतिकार्य योजनाअनुसार काम गरिरहेको बताए।
उनका अनुसार जिल्लाका राप्तीसोनारी, नरैनापुर र डुडुवा गाउँपालिका बाढी तथा डुबानको बढी जोखिममा छन्। ती क्षेत्रमा सम्भावित विपद्लाई ध्यानमा राखेर विशेष तयारी गरिएको उनले बताए।
राप्ती नदीमा आउने बाढीबाट जोगाउन राप्तीसोनारी, नरैनापुर र डुडुवाका विभिन्न स्थानमा तटबन्ध निर्माण गरिएको छ। तटबन्ध निर्माणपछि विगतको तुलनामा जोखिम केही कम भए पनि बाढीको सम्भावित जोखिम पूर्ण रूपमा हटिनसकेको जिल्ला विपद् व्यवस्थापन समितिले जनाएको छ।
समितिका अनुसार तटबन्ध नभएका तथा अन्य सम्भावित जोखिमयुक्त क्षेत्रमा समेत आवश्यक सतर्कता अपनाइएको छ। स्थानीय तह, सुरक्षा निकाय र सम्बन्धित सरोकारवाला निकायलाई समन्वय गरेर विपद्को पूर्वतयारीमा रहन आग्रह गरिएको छ।
Discussion about this post