बाँके, भदौ १६ गते ।
बाँकेमा ६ हजारभन्दा बढी किशोरीलाई एचपीभी खोप लगाइने भएको छ । आगामी भदौ ३० गतेदेखि जिल्लाका आठवटै पालिकामा खोप अभियान सञ्चालन गरिने भएको हो ।
जिल्ला खोप समन्वय समितिका अध्यक्ष एवं जिल्ला समन्वय समिति बाँकेका प्रमुख ज्ञानेन्द्रकुमार चौधरीको अध्यक्षतामा बसेको बैठकले अभियान सञ्चालन गर्ने निर्णय गरेको हो ।
स्वास्थ्य कार्यालय बाँकेका प्रमुख सुनिता पौडेलले पहिलो चरणमा विद्यालयबाट खोप अभियान सुरु गरिने बताइन् । उनका अनुसार कक्षा ६ मा अध्ययनरत किशोरीलाई प्राथमिकतामा राखेर खोप लगाइनेछ ।
विद्यालयमा खोप अभियान सकिएपछि समुदायमा रहेका १० वर्ष उमेरका किशोरीलाई खोप दिइने पौडेलले बताइन् ।खोप अभियान प्रभावकारी बनाउन स्थानीय तह, विद्यालय र स्वास्थ्य संस्थासँग समन्वय गरेर तयारी भइरहेको उनले बताइन् ।
बाँकेका आठवटै पालिकामा अभियान सञ्चालन गरिने स्वास्थ्य कार्यालयले जनाएको छ ।
पाठेघरको मुखको क्यान्सरबाट बचाउन एचपीभी खोप लगाइन्छ । एचपीभी भाइरसका केही प्रकारले पाठेघरको मुखको क्यान्सर गराउन सक्ने भएकाले किशोरी अवस्थामा नै खोप लगाउँदा जोखिम कम गर्न सकिने स्वास्थ्यकर्मीले बताएका छन् ।
Discussion about this post