बाँके, असोज १८ गते ।
बाँकेमा सुरक्षित गर्भपतन सेवा लिनेको संख्या बढेको छ । स्वास्थ्य कार्यालय बाँकेका अनुसार गत आर्थिक वर्ष २०८२/८३ मा जिल्लामा ३ हजार ५०७ जनाले सुरक्षित गर्भपतन सेवा लिएका छन् । यो संख्या अघिल्लो आर्थिक वर्षको तुलनामा ४१७ ले बढी हो ।
स्वास्थ्य कार्यालय बाँकेकी पब्लिक हेल्थ नर्स अधिकृत विष्णु श्रेष्ठका अनुसार गत आर्थिक वर्ष सुरक्षित गर्भपतन सेवा लिनेमा २० वर्षमुनिका १३४ जना छन् । यस अवधिमा १२ हप्ताभन्दा बढी अवधिको गर्भपतन गराउने २८ जना रहेका छन् ।
आर्थिक वर्ष २०८१/८२ मा जिल्लामा ३ हजार ९० जनाले सुरक्षित गर्भपतन सेवा लिएका थिए । अघिल्लो वर्षको तुलनामा गत आर्थिक वर्ष सेवा लिनेको संख्या बढेको श्रेष्ठले बताइन् ।
नेपाल परिवार नियोजन संघ बाँकेकी शाखा प्रबन्धक रश्मी श्रेष्ठले सुरक्षित गर्भपतन सेवा विस्तारसँगै असुरक्षित गर्भपतनबाट महिलाको ज्यान जोखिममा पर्ने अवस्था कम हुँदै गएको बताइन् ।
उनका अनुसार सन् २००४ देखि नेपालमा सुरक्षित गर्भपतन सेवा सञ्चालनमा आएपछि महिलाले स्वास्थ्य संस्थामार्फत सेवा लिने अवसर पाएका छन् । नेपाल परिवार नियोजन संघका २० वटा शाखामध्ये बाँके शाखाले पनि सुरक्षित गर्भपतन सेवा र सचेतनामूलक कार्यक्रम सञ्चालन गर्दै आएको उनले बताइन् ।
भेरी अस्पताल नेपालगन्जका प्रसूति तथा स्त्रीरोग विशेषज्ञ डा. नवीन बुढाथोकीले स्वास्थ्य संस्था र तालिमप्राप्त स्वास्थ्यकर्मीबाट सेवा लिने क्रम बढ्दा असुरक्षित गर्भपतनबाट हुने जोखिम घटाउन मद्दत पुगेको बताए ।
उनका अनुसार असुरक्षित गर्भपतनले अत्यधिक रक्तस्राव, संक्रमण, पाठेघरमा चोटपटक लाग्ने तथा महिलाको ज्यानसमेत जान सक्ने जोखिम हुन्छ । त्यसैले सरकारले अनुमति दिएका स्वास्थ्य संस्थाबाट मात्रै सुरक्षित गर्भपतन सेवा लिनुपर्नेमा उनले जोड दिए ।
Discussion about this post