बाँके, असोज २५ गते ।
बाँके युनेस्को क्लबले युवा उद्यमशीलता प्रवद्र्धन, परियोजना कार्यान्वयनलाई प्रभावकारी बनाउने र दिगो जीविकोपार्जनका अवसर विस्तार गर्ने उद्देश्यले आफ्ना कर्मचारीका लागि तीनदिने अभिमुखीकरण कार्यक्रम सम्पन्न गरेको छ।
प्लान इन्टरनेसनल नेपालको साझेदारीमा सञ्चालित युवा सशक्तीकरण, रूपान्तरण तथा नवप्रवर्तन परियोजना–२ अन्तर्गत अभिमुखीकरणसँगै परियोजनाबाट सहयोग प्राप्त युवा उद्यमहरूको स्थलगत अवलोकनसमेत गरिएको क्लबले जनाएको छ।
अभिमुखीकरणमा प्रभावकारी समन्वय, पारदर्शिता, जवाफदेहिता, अभिलेखीकरण, नियमित अनुगमन, बालबालिका तथा सहभागीको सुरक्षा, लैङ्गिक समानता, सामाजिक समावेशीकरण र वातावरणीय दिगोपनका विषयमा छलफल गरिएको थियो। स्वीकृत परियोजना दस्तावेज र संस्थागत मापदण्डअनुसार गुणस्तरीय कार्यक्रम सञ्चालन गर्न आवश्यक ज्ञान तथा सीप विकासमा समेत जोड दिइएको थियो।
कार्यक्रमको सहजीकरण प्लान इन्टरनेसनल नेपालका प्राविधिक सल्लाहकार प्रतिमा कुँवर र कार्यक्रम विशेषज्ञ दुर्गाकुमारी क्षेत्रीले गरेका थिए।
अभिमुखीकरणमा परियोजनाअन्तर्गत व्यावसायिक विकासका लागि सहयोग प्राप्त गरिरहेका युवा उद्यमीहरूले आफ्ना व्यवसायको प्रगति, उपलब्धि, सञ्चालनका क्रममा भोग्नुपरेका चुनौती र भविष्यमा व्यवसाय विस्तार गर्ने योजनाबारे प्रस्तुति दिएका थिए।
युवा उद्यमको स्थलगत अवलोकन
अभिमुखीकरणकै क्रममा परियोजनाबाट सहयोग प्राप्त युवा उद्यमहरूको स्थलगत अवलोकन गरिएको थियो। अवलोकन टोलीले बंगुरपालन, स्थानीय कुखुरापालन, बाख्रापालन, किराना पसल र खाजा व्यवसाय सञ्चालन गरिरहेका युवा उद्यमीहरूसँग भेटघाट गरी व्यवसायको अवस्था, उपलब्धि, चुनौती र विस्तारका सम्भावनाबारे जानकारी लिएको थियो।
अवलोकनका क्रममा व्यवसायको प्रकृतिअनुसार पशुपालन व्यवस्थापन, पशुको स्वास्थ्य, दाना तथा आहार व्यवस्थापन, रोग रोकथाम, मौज्दात व्यवस्थापन, ग्राहक सेवा, उत्पादनको गुणस्तर, सरसफाइ, बजार प्रवद्र्धन र आर्थिक कारोबारको अभिलेख राख्ने विषयमा छलफल गरिएको क्लबले जनाएको छ।
अभिमुखीकरण र स्थलगत अवलोकनले कर्मचारीको ज्ञान तथा संस्थागत मापदण्डसम्बन्धी बुझाइ बढाउनुका साथै परियोजनाको योजना र रणनीतिलाई युवा उद्यमीका वास्तविक अनुभव तथा आवश्यकतासँग जोड्न सहयोग पुगेको क्लबको भनाइ छ।
यसले परियोजना कार्यान्वयनको गुणस्तर सुधार, संस्थागत जवाफदेहिता र साझेदारी सुदृढ गर्नुका साथै युवा उद्यमीलाई आवश्यकताअनुसार सहयोग उपलब्ध गराउने प्रतिबद्धता बलियो बनाएको क्लबले जनाएको छ।
कार्यक्रममा क्लबका अध्यक्ष प्रवेज अली सिद्दिकी, उपाध्यक्ष पञ्चम गुरुङ, कार्यकारी निर्देशक रविकुमार तुलाधर, प्राविधिक परामर्शदाता बिनय दिल लामा, प्राविधिक सल्लाहकार साजिद अली सिद्दिकी, वित्त, प्रशासन तथा सञ्चालन व्यवस्थापन प्रतिनिधि बेदप्रसाद पंगाली, सदस्य शंकरसिंह थारु, कार्यक्रम संयोजक राधे चौधरी, परियोजना अधिकृत होमप्रसाद चौधरी तथा कर्मचारी सुनीता चौधरी र सिर्जना चौधरीलगायत सहभागी थिए।
बाँके युनेस्को क्लब र प्लान इन्टरनेसनल नेपालको साझेदारीमा सञ्चालित परियोजनाले युवाको क्षमता विकास, उद्यमशीलता प्रवद्र्धन, जीविकोपार्जनका अवसर विस्तार तथा दिगो र समावेशी भविष्य निर्माणमा काम गर्दै आएको छ।
Discussion about this post