बाँके, मंसिर ४ गते ।
चाडपर्व लक्षित लामो बिदाका कारण नेपालगन्जमा देखिएको रगतको अभाव अझै हट्न सकेको छैन । अस्पतालमा दैनिक रगतको माग उच्च रहे पनि सोही अनुपातमा रक्तसञ्चय हुन नसक्दा अभाव कायम रहेको हो ।
नेपाल रेडक्रस सोसाइटी, प्रादेशिक रक्तसञ्चार केन्द्र नेपालगन्जका प्रमुख उपेन्द्र रेग्मीले रगतको अभाव हटाउन नियमित रक्तदान कार्यक्रम सञ्चालन गर्नुपर्ने बताए । उनले नेपालगन्जका अस्पतालमा मात्रै दैनिक ७० देखि ८० पिन्ट रगतको माग हुने गरेको तर त्यसअनुसार मौज्दात नरहेको जानकारी दिए ।
लुम्बिनीसहित सुदूरपश्चिम र कर्णाली प्रदेशका बिरामीलाई समेत रगत उपलब्ध गराउनुपर्ने भएकाले संस्थागत रक्तदान कार्यक्रम आवश्यक रहेको उनले बताए ।
’नेपालगन्जका अस्पतालका लागि मात्रै दैनिक ७० देखि ८० पिन्ट रगतको माग हुन्छ । तर, मागअनुसार रगत मौज्दात छैन,’ रेग्मीले भने, ’संस्थागत रूपमा रक्तदान कार्यक्रम सञ्चालन भए रगत सङ्कलनमा सहयोग पुग्छ ।’
रक्तसञ्चार केन्द्रले खजुरा र कोहलपुरस्थित शाखाबाट समेत रगत सङ्कलन गर्दै आएको छ । कतिपय अवस्थामा बिरामीलाई रगत उपलब्ध गराउँदा सट्टापट्टाको व्यवस्था गर्नुपर्ने अवस्था रहेको रेग्मीले बताए । रगतको अभाव कम गर्न नियमित रक्तदानलाई प्राथमिकता दिनुपर्ने उनको भनाइ छ ।
’अहिले केही संस्थाले छिटपुट रूपमा रक्तदान गरिरहेका छन् । तर, त्यो पर्याप्त छैन,’ उनले भने । केही दिनभित्र अर्को संस्थाले पनि रक्तदान कार्यक्रम आयोजना गर्न लागेको र त्यसबाट केही पिन्ट रगत सङ्कलन हुने उनले जानकारी दिए ।
प्रादेशिक रक्तसञ्चार केन्द्रका अनुसार कोहलपुरका आठ अस्पतालमा दैनिक २० देखि २५ पिन्ट रगतको माग हुने गरेको छ । त्यस्तै, खजुराका दुई अस्पतालमा दैनिक १० देखि १२ पिन्ट र नेपालगन्जका २७ अस्पतालमा करिब ८० पिन्ट रगत आवश्यक पर्ने गरेको छ ।
नेपाल रेडक्रस सोसाइटी बाँकेका सभापति गोवद्र्धन सम्झनाले विभिन्न प्रक्रियाबाट रगत सङ्कलन तथा वितरण भइरहेको बताए । उनले रगत लिने र दिने प्रणालीबाट पनि अभाव व्यवस्थापन भइरहेको जानकारी दिए ।
रगतको अभावका कारण नेपालगन्जमा ठूलो समस्या आउन नदिएको उल्लेख गर्दै उनले आवश्यक परेको अवस्थामा स्वयंसेवी रक्तदातामार्फत रगतको व्यवस्था गरिँदै आएको बताए ।
४५ पटकसम्म रक्तदान गरिसकेका नेपालगन्ज–९ निवासी झविन्द्र शर्माले रगत लिने व्यक्तिले पनि अरूलाई रगत दिनुपर्छ भन्ने भावना विकास गर्नुपर्ने बताए । जन्मदिन तथा वैवाहिक उत्सवका अवसरमा रक्तदान गर्ने प्रचलन बढ्दै गएको उल्लेख गर्दै उनले स्थानीय तहले पनि रक्तदान कार्यक्रमलाई प्राथमिकता दिनुपर्नेमा जोड दिए ।
उनले स्थानीय सरकारलाई वर्षमा कम्तीमा दुई पटक रक्तदान कार्यक्रम आयोजना गर्न आग्रह गरे । नियमित रक्तदानको संस्कार विकास गर्न सके रगतको अभाव न्यूनीकरण गर्न सकिने उनको भनाइ छ ।











Discussion about this post